DÍLI, 09/10/2026. Koordenadór Unidade Kontrolu no Verifikasaun Kualidade (UCVQ) ADN, I.P Arq. Francisco Xavier de Deus Jerónimo, loke workshop kona-ba padraun tékniku no garantia kualidade infraestrutura, ne’ebé organiza husi organizasaun naun-governamentál (NGO) PARTISIPA ne'ebé maka realiza iha salaun enkontru Hotel JL Vila, Aimutin, Díli.

Workshop ida-ne’e iha objetivu atu hasa’e koñesimentu no komprensaun partisipante sira nian kona-ba aplikasaun padraun tékniku, prosesu verifikasaun no kontrolu kualidade, núdar elementu importante sira atu garante katak projetu infraestrutura iha Timor-Leste kumpre rekezitu tékniku no kualidade ne’ebé estabelese ona.

Iha nia intervensaun, Koordenadór UCVQ-ADN Arq. Francisco Xavier de Deus Jerónimo afirma katak infraestrutura sai núdar baze importante ida ba dezenvolvimentu nasaun nian. Tanba ne’e, dezenvolvimentu infraestrutura la’ós de’it kona-ba konstrusaun estrada, ponte no edifísiu, maibé mós presiza asegura katak obra sira-ne’e kumpre padraun tékniku, seguru, duradouru no responde ba nesesidade komunidade nian.

Nia esplika katak, liuhusi workshop ida-ne’e, partisipante sira sei iha oportunidade atu komprende no fahe koñesimentu kona-ba padraun tékniku ne’ebé ADN, I.P dezenvolve ona, inklui TL-SMM no TL-SUP, núdar referénsia importante iha prosesu planeamentu, implementasaun no garantia kualidade infraestrutura.

Padronizasaun sai hanesan dalan atu hametin kualidade obra públika. Bainhira parte interesada sira komprende no aplika padraun tékniku ne’ebé hanesan, prosesu konstrusaun no verifikasaun kualidade bele hala’o ho konsisténsia, transparénsia no responsabilidade, hodi hamenus risku ba erru tékniku no problema kualidade iha futuru.

Iha kontestu ida-ne’e, Koordenadór UCVQ ADN, I.P enkoraja partisipante sira atu partisipa ativu, hato’o pergunta no buka klarifikasaun ba formadór sira, atu asegura katak matéria téknika ne’ebé aprezenta bele komprende no aplika ho loos iha prátika.

Durante workshop, asesór tékniku no tékniku superior sira husi Laboratóriu no Unidade Estudu, Dezenvolvimentu no Kapasitasaun (UEDC) ADN, I.P mós aprezenta matéria téknika relevante sira, inklui prosesu kriasaun no elaborasaun padraun iha ADN, I.P; mekanizmu utilizasaun TL-SMM no TL-SUP; konstrusaun estrada lokál (Local Road Construction); importánsia teste laboratóriu no verifikasaun iha terrenu; no garantia kualidade infraestrutura komunitária.

Matéria sira-ne’e fó komprensaun ba partisipante sira kona-ba ligasaun entre padraun tékniku, teste laboratóriu no verifikasaun direta iha tereñu. Elementu hirak-ne’e importante atu avalia se materiál konstrusaun no servisu ne’ebé hala’o iha obra kumpre espesifikasaun téknika ne’ebé determina ona.

Liuliu, teste laboratóriu no verifikasaun iha tereñu iha papél importante atu identifika no prevene defisiénsia téknika durante prosesu konstrusaun, hodi apoia desizaun téknika ne’ebé bazeia ba rezultadu verifikável no promove utilizasaun rekursu públiku ho responsabilidade.

jeralmente, workshop ida-ne’e reprezenta oportunidade atu hametin kapasidade téknika, promove partilla koñesimentu no hasa’e komprensaun kona-ba padronizasaun no garantia kualidade infraestrutura. Esforsu hanesan ne’e importante atu apoia implementasaun projetu infraestrutura ne’ebé kumpre padraun tékniku no kontribui ba dezenvolvimentu sustentavel iha Timor-Leste.