RAEOA,13/10/2026. Ekipa tékniku husi ADN I.P RAEOA hala’o monitorizasaun ba projetu konstrusaun infraestrutura seguransa iha Postu Administrativu Nitibe, RAEOA, ne’ebé inklui konstrusaun Postu Eskuadra foun, kazerna PNTL no edifísiu foun Unidade Polísia Fronteira (UPF) iha Citrana. Projetu sira ne’e iha responsabilidade Ministériu Interiór, ho implementadór diferente sira ne’ebé responsavel ba implementasaun obra.

Projetu konstrusaun Postu Eskuadra foun iha Baocnana, Suku Bene Ufe, hahú iha loron 2 fulan Setembru tinan 2026, ho durasaun kontratu fulan 12 no montante kontratu USD 517,877.74. Projetu ne’e implementa husi Raynaldo’s Unipesoál Lda.

Bazeia ba rezultadu monitorizasaun, progresu fíziku projetu atinji ona 8.23%. Servisu ne’ebé hala’o ona inklui preparasaun fatin konstrusaun, eskavasaun fundasaun no instalasaun armadura besi ba sapatu fundasaun (footing) no viga ligasaun (tie beam). Enkuantu servisu ne’ebé hala’o hela mak instalasaun bekisting ba sapatu fundasaun no viga ligasaun.

Iha monitorizasaun ne’e, ADN fó rekomendasaun ba empreiteiru atu hadi’a instalasaun armadura besi ba viga ligasaun no instala espasadór betaun (concrete spacer) ho medida apropriada, atu asegura kober­tura betaun ba armadura besi tuir espesifikasaun téknika.

Iha fatin hanesan, ADN I.P RAEOA mós hala’o monitorizasaun ba projetu konstrusaun kazerna PNTL iha Baocnana, Suku Bene Ufe, Postu Administrativu Nitibe. Projetu ne’e hahú iha loron 3 fulan Juñu tinan 2026, ho durasaun kontratu fulan 12 no montante kontratu USD 1,414,558.79. Projetu ne’e implementa husi konsórsiu Monte Casa Sul Unipesoál Lda hamutuk ho Jenic Enterprises Unipesoál Lda.

Rezultadu monitorizasaun hatudu katak progresu fíziku projetu konstrusaun kazerna PNTL atinji ona 0.79%. Servisu ne’ebé hala’o ona mak preparasaun fatin konstrusaun, enkuantu servisu ne’ebé hala’o hela mak eskavasaun fundasaun no instalasaun geotêxtil.

Atu asegura implementasaun projetu la'o tuir kalendáriu servisu no prazu kontratu, ADN fó rekomendasaun ba konsórsiu empreiteiru atu aselera servisu eskavasaun fundasaun no mobilizasaun materiál ba obra.

Aleinde projetu rua ne’e, ekipa tékniku ADN I.P RAEOA mós hala’o monitorizasaun ba projetu konstrusaun edifísiu foun Unidade Polísia Fronteira (UPF) iha Citrana, Suku Bene Ufe, Postu Administrativu Nitibe, ne’ebé implementa husi kompaña Aprilia Unipessoal Lda, ho Ministériu Interiór núdar na’in ba projetu.

Projetu ne’e hahú iha loron 12 fulan Dezembru tinan 2025, ho durasaun kontratu fulan 12 no montante kontratu USD 462,988.43. Bazeia ba rezultadu monitorizasaun, progresu fíziku projetu atinji ona 60.44%, enkuantu progresu pagamentu hamutuk 27.62%.

Servisu konstrusaun ne’ebé hala’o ona inklui konstrusaun fundasaun, sinta rai, instalasaun estrutura ai, konstrusaun parede bloku betaun, sinta leten, instalasaun estrutura kuda-kuda no kakuluk, no instalasaun estrutura alumíniu no besi ba odamatan no janela.

Enkuantu servisu ne’ebé hala’o hela mak instalasaun serámika ba rai, instalasaun plafón, servisu rebo no akabadura edifísiu.

Durante monitorizasaun, ekipa tékniku verifika mós utilizasaun materiál konstrusaun atu asegura kumprimentu ba espesifikasaun téknika projetu. Teste kualidade beton ne’ebé hala’o ona inklui slump test, atu verifika konsisténsia betaun fresku, no concrete compression test, atu determina rezisténsia betaun. Bazeia ba informasaun ne’ebé aprezenta, rezultadu teste sira ne’e pasa tuir kritériu ne’ebé aplika.

Maski nune’e, ADN fó rekomendasaun ba empreiteiru atu hadi’a fali servisu iha estrutura ai no parte parede balu, no aselera servisu konstrusaun ne’ebé seidauk remata, atu asegura kualidade obra no kumprimentu ba prazu kontratu.

Monitorizasaun ba projetu infraestrutura seguransa sira ne’e núdar parte husi responsabilidade ADN I.P atu akompaña no kontrola implementasaun obra públika, hodi asegura katak servisu konstrusaun kumpre dezeñu, espesifikasaun téknika, padraun kualidade no prazu kontratu ne’ebé determina.