Dili, 13/10/2026. Ajénsia Dezenvolvimentu Nasionál, Institutu Públiku (ADN, I.P), kontinua hala’o atividade inspeksaun no monitorizasaun ba implementasaun projetu infraestrutura iha munisípiu Manatuto, Baucau no Bobonaro, atu akompaña progresu servisu no verifika kumprimentu ba dezeñu, espesifikasaun téknika no rekizitu kualidade ne’ebé estabelese iha kontratu.

Iha Munisípiu Manatuto, ekipa téknika ADN, I.P hala’o inspeksaun ba prosesu pagamentu dahuluk ba projetu konstrusaun foun postu saúde no mós rezisténsia ba Médiku sira iha Fatumakerek, Soibada, Manatuto, ne’ebé implementa husi kompaña Continuaramigo, Lda. Inspeksaun ne’e iha objetivu atu verifika progresu servisu ne’ebé ezekuta ona, núdar parte husi prosesu avaliasaun ba pagamentu tuir kondisaun kontratu.

Iha Munisípiu Baucau, ADN, I.P hala’o monitorizasaun ba projetu Reabilitasaun Igreja São João Bosco Gariuai, ne’ebé implementa husi kompania SKRaG Unipesoál Lda. Atividade ne’e foka ba akompañamentu progresu servisu no verifikasaun konformidade obra ho rekizitu tékniku ne’ebé aplika ba projetu.

Enkuantu iha Munisípiu Bobonaro, ekipa téknika hala’o inspeksaun no akompañamentu ba teste trial mix ba betaun ho rezisténsia komprimida ne’ebé espesifika 24 MPa, iha projetu konstrusaun foun Eskuadra iha Batugade, Bobonaro. Projetu ne’e implementa husi kompaña Rineazelmar Unipesoál, Lda ho montante kontratu USD 547,075.73.

Teste ne’e hala’o iha koordenasaun ho Laboratóriu ADN, I.P atu akompaña verifikasaun téknika kona-ba kompozisaun betãun no kualidade materiál ne’ebé sei uza iha obra.

Durante inspeksaun, ekipa téknika rekomenda ba kompaña atu asegura katak kompozisaun betãun tuir mistura ne’ebé aprova ona, hadi’a montajen armadura besi iha elementu fundasaun (footing) no asegura katak koberura betãun (concrete cover) kumpre dezeñu no espesifikasaun téknika antes kontinua ba servisu konkretajen.

Rekomendasaun hirak-ne’e atu asegura pozisionamentu loos ba armadura besi, koberura betãun ne’ebé adekuadu no kualidade servisu konkretajen, tuir padraun tékniku ne’ebé determina ona.

Liuhusi atividade inspeksaun no monitorizasaun hirak-ne’e, ADN, I.P kontinua hala’o akompañamentu tékniku ba implementasaun projetu infraestrutura, ho objetivu atu promove kumprimentu ba kondisaun kontratu, asegura kualidade konstrusaun no hametin durabilidade obra públika.