Dili,20/04/2026. Koordenadór UCVQ-ADN Arq. Francisco Xavier de Deus Jerónimo hamutuk ho Enjeñeru sira akompaña Primeiru Ministru RDTL, S.E. Kay Rala Xanana Gusmão, halo observasaun direta iha Aeroportu Internasionál Prezidente Nicolau Lobato hodi identifika kauza prinsipal husi inundasaun ne’ebé sempre afeta infraestrutura aeroportu ne’e.

Iha vizita ne’e, Primeiru Ministru haree kondisaun sistema drenajen, fluxu bee no faktór ambientál sira seluk ne’ebé kontribui ba akumulasaun bee bainhira udan boot monu. Problema inundasaun iha aeroportu la’ós de’it afeta operasaun voos, maibé mós bele fó impaktu negativu ba seguransa no servisu transporte aéreu iha nasaun ida ne’e.

Governu liu husi instituisaun relevante sira sei halo avaliasaun téknika kle’an liután atu determina solusaun ne’ebé apropriadu, inklui melloramentu sistema drenajen, reabilitasaun infra-estrutura no planeamentu jestaun risku dezastre.

Observasaun ne’e mós hanesan parte husi esforsu governu atu asegura katak Governu Timor-Leste kontinua fó atensaun ba dezenvolvimentu infra-estrutura estratéjiku no reziliénsia hasoru mudansa klimátika ne’ebé aumenta frekuénsia inundasaun iha área urbana sira hanesan Dili.(Média-ADN)