Dili, 13/02/2026. Diretór Ezekutivu ADN,I.P Eng. Januario Maia Guterres akompaña mós husi Koordenadóra UGA-ADN,I.P Sra. Amelia da Costa no ekipa inklui Assesór Tékniku ADN,I.P partisipa iha atividade Disseminasaun Dekretu Lei nú 3/2026, 3 fulan Fevereiru kona-ba rezime Juridiku ba kontratu traballu iha termu sertu iha Administrasaun Públiku. Atividade ida ne’e rasik realiza iha Auditoriu Ministériu Finansas, Aitarak laran, Dili.

Sesaun disseminasaun ida ne’e ho ninia objetivu maka atu fahe no klarifika ba entidade públiku sira kona-ba nia implementasaun no garante oreintasaun ba kontrolu traballu iha termu sertu.

Atividade dessiminasaun ida ne’e rasik organiza husi Diresaun Jerál Tezouru, Ministériu Finansas, ne’ebé marka prezensa mós husi Prezidente no Dirijénte sira servisus no Entidades Setór Públiku Administrativu, Diretóres no Sekretariu Jerál servisu Koorporativus, Diretóres Administrasaun ho finansas no rekursu umanus.

Antes ne’e iha Sorumutu Konsellu Ministrus loron 14 fulan-janeiru tinan 2026 Aprova mós ba projetu Dekretu-Lei ne’ebé aprezenta husi Ministra Finansas S.E Santina José Rodrigues F. Viegas Cardoso, Prezidente Komisaun Funsaun Públika Sr.  Agostinho Letêncio de Deus no husi grupu traballu ba reforma jestaun rekursus umanus iha Administrasaun Públika nian, kona-ba Rejime Jurídiku ba Kontratus Traballu ho Termu Sertu iha Administrasaun Públika.

Diploma ida-ne’e ho objetivu prinsipál atu estabelese rejime jurídiku ida ne’ebé klaru, uniforme no transparente hodi selebra, jere no fiskaliza kontratus traballu ho termu sertu iha Administrasaun Públika, hodi garante utilizasaun ida ne’ebé responsavel ba rekursus umanus no finanseirus Estadu nian hodi hatán ba nesesidades temporárias servisus nian.

Entre medida prinsipál sira ne'ebé agora aprova ona maka definisaun ba prosedimentus rekrutamentu no selesaun nian bazeia ba kritériu méritu, transparénsia no igualdade jéneru, estabelesimentu regra sira ne'ebé klaru kona-ba durasaun kontratus no sira-nia limite renovasaun ida-idak, kriasaun kategoria kontratadu no eskalaun remuneratóriu ho valór mínimu no másimu ne'ebé define ona, no mós introdusaun ba mekanizmu jestaun no avaliasaun dezempeñu ne'ebé bazeia ba planu serbisu, relatóriu periódiku no indikadór sira rezultadu nian. Diploma ne’e mós estabelese regra espesífiku sira kona-ba impedimentu, eskluzividade, benefísiu aplikavel sira, fonte finansiamentu nian no mós responsabilidades hosi servisus rekursus umanus no Ministériu Finansas. (Media_ADN)