Dili, 19/02/2026. Ajénsia Dezenvolvimentu Nasionál,Institutu Públiku (ADN,I.P) liu husi Koordenadóra Unidade Jestaun Administrativa (UGA-Sigla Portugés) Sra. Amelia da Costa akompaña husi Tékniku Superior UGA Sra. Angela M. E. Correia no mós Ofisiais Finansas UGA-ADN Sra. Ferdiana Maia Duarte partisipa iha Refreshing Training Relatoriu Finanseira Anual IPSAS Baze Kaixa ne’ebé maka realiza iha Auditorium Ministériu Finansas, Aitarak laran, Dili.

Objetivu husi formasaun ne'e atu hasa'e koñesimentu tékniku ba tékniku sira ne'ebé servisu iha área kontabilidade no relatóriu hodi lha komprensaun ne'ebé di'ak, koñesimentu kle'an kona-ba análize servisu kontabilidade, no relatóriu hodi responde ba difikuldade ne'ebé hasoru durante ne'e.

Vise Ministra Finansas S.E Regina de Jesus Sousa iha nia nia diskursu ba abertura Refreshing Training Relatoriu Finanseira Anual IPSAS Baze Kaixa ne’e husu atu partisipante sira atu bele partisipa ho masimu mesmu treinamentu ida ne’e la’os buat foun ba partisipante sira.

“ Importante tebes ita boot sira iha ne’e, maka ita boot sira nia partisipasaun masimu, treinamentu ida ne’e la’os foun ba ita boot sira, ne’e hanesan refresing training ba ita boot sira, atu nune’e hakle’an tan ita boot sira nian, koñesimentu, liliu iha preparasaun relatoriu finanseiru anúal ita boot sira nian, konta jerál ne’e Ministériu finansas liu husi diresaun jerál tezouru maka prepara maibé relatoriu finanseiru anúal ba entidades idak-idak ita boot sira maka prepara, no submete ba iha kamara de kontas.” Hateten Vise Ministra Finansas iha nia diskursu abertura formasaun ida ne’e.

Vise Ministra Finansas ne’e mós husu nafatin ba iha partisipante sira iha formasaun ida ne’e atu aproveita di’ak no partisipa ho masimu ho formasaun ida ne’e, tanba formasaun ida ne’e hala’o durante loron ida de’it, no la’os kumpri de’it lei aprezenta relatoriu, tengki kualidade, tengki esplika sa-ida maka halo,osan estadu nia gasta ba sa-ida tengki esplika klaru, se lae la iha informasaun, Vise Ministra Finansas ne’e reforsa katak, relatoriu husi Ministériu Finansas ne’e konsolida de’it informasaun no la’os detallu hanesan ho partisipante sira halo, tuir Vise Ministra katak, partisipante sira núdar implementadór tenki aprezenta informasaun sira ne’ebé maka gasta husi osan Estadu nian.

Atu hakotu nia intervensaun ne’e, Vise Ministra Finansas apela atu partisipante sira durante formasaun la komprende buat ruma karik tengki husu pergunta hodi nune’e sai husi formasaun ne’e sei la-iha tan ona duvidas, no independentemente bele halo ona relatoriu.

Entertantu, Refreshing Training Relatoriu Finanseira Anual IPSAS Baze Kaixa ida ne’e rasik organiza husi Diresaun Jerál Tesouru Ministériu Finansas no partisipa husi Diresaun Nasionál Finansas, Tékniku Kontabilidade husi Servisu no entidade Setór Públiku Administrativu no RAEOA. (Media_ADN)