Vizita ofisiál PM ba Liquiça hodi hare besik servisu munisipal nian liu-liu rezultadu husi Avaliasaun Kondisaun Mínima ne'ebé hala'o husi MAE.

Liquiça,24/02/2026. Diretór Ezekutivu Ajénsia Dezenvolvimentu Nasionál, Institutu Públiku (ADN,I.P) akompaña husi Tékniku ADN,I.P destakadu iha munisipiu Liquiça partisipa iha  vizita ofisiál Primeiru Ministru RDTL S.E Kay Rala Xanana Gusmão nia ba munisipiu Liquiça.

Objetivu husi vizita ofisiál Primeiru Ministru nian ne’e hodi hare besik servisu munisipal nian liu-liu rezultadu husi Avaliasaun Kondisaun Mínima ne'ebé hala'o husi Ministériu Administrasaun Estatál (MAE), hodi nune’e iha tinan 2027 munisípiu sira ne’ebé preparadu ona bele hakat ba eleisaun kámara munisipál.

Durante iha vizita ofisiál ne’e, Primeiru Ministru RDTL S.E Kay Rala Xanana Gusmão ho komitiva observa implementasaun programa merenda eskolár iha EBC,1.2.3 Liquiça Vila; Inaugura Konstrusaun no Estensaun Sala Konsulta Sentru Saude Maubara ne’ebé finansia husi PDIM; Vizita Sentru Saúde Komunitáriu Liquiça Vila no vizita fatin turistiku Kaitehu.

Membru Governu ne’ebé marka mós prezensa iha vizita ne’e mak Ministru MPIE S.E Gastão Fransisco de Sousa, Ministra Saúde S.E Elia A.A. dos Reis Amaral, Ministru Justisa S.E Sérgio de Jesus Fernandes da Costa Hornai, Ministériu Ensinu Superiór, Siénsia no Kultura (MESCC) S.E José Honório da Costa Jerónimo, Sekretáriu Estadu Dezenvolvimentu Lokál Mateus W. Dos Santos Tallo, Vise-Ministra Solidariedade Sosiál no Inkluzaun, Sra. Céu Brites, Sekretáriu Estadu Peskas, Domingos da Conceição dos Santos, Sekretáriu Estadu Komunikasaun Sosiál Sr. Expedito Ximenes Loro Dias no mós Vise-Ministru ba Infraestruturas, Sr. Júlio do Carmo. (Media_ADN)