Liquiça, 19/02/2026. Diretór Adjuntu ADN,I.P Eng. Demistocles G. X. F. Cabral akompaña husi Tékniku ADN,I.P destakadu iha munisipiu Liquiça hala’o enkontru ho Sekretariu Munisipál Administrasaun Planeamentu, Investimentu no Dezenvolvimentu Integradu da Autoridade Munisipiu Liquiça Sr. Francisco dos Santos Pereira, L.DC ne’ebé maka iha biban ne’e reprezenta hela Prezidente Autoridade Munisipiu Liquiça Sr. Paulino Ribeiro. M.PA. Enkontru ida ne’e realiza iha Edifisiu Administrasaun Autoridade Munisipiu Liquiça.

Objetivu husi enkontru ida ne’e maka atu partilla hela informasaun balu ba Autoridade Munisipu relasiona ho orientasaun ne’ebé iha atu halo identifikasaun ba kondisaun eskola no postu saúde sira ne’ebé maka ho kondisaun át no grave inklui postu saúde sira ne’ebé maka dook husi Suku no komunidade. Identifikasaun ne’e halo atu nune’e bele rekolla dadus real hodi kontinua aprezenta ba iha Ministru MPIE no bele hato’o iha KAFI hodi nune’e bele halo foti desizaun ruma tantu atu halo rehabilitasaun ka halo konstrusaun foun.

Termina tiha enkontru, Diretór Adjuntu hamutuk ho tékniku ADN,I.P destakadu iha munisipiu Liquiça hamutuk ho ekipa husi Ministériu saúde no Edukasaun, Diretór servisu Munisipál Edukasaun no Saúde, tun ba tereñu hodi observa no halo identifikasaun ba kondisaun real husi eskola no mós postu saúde iha munisipiu Liquiça. (Media_ADN)