Ermera, 16/02/2026. Diretór Ezekutivu ADN,I.P Eng. Januario Maia Guterres akompaña husi Tékniku ADN,I.P destakadu iha munisipiu Ermera hamutuk ho Xefi Departamentu Infra-estrutura Ministériu Edukasaun nian hala’o enkontru Koordenasaun servisu ho Prezidente Autoridade Munisipiu Ermera Sr. José Martinho dos Santos Soares relasiona ho identifikasaun kondisaun eskola no postu saúde sira ne’ebé maka ho kondisaun estragadu no grave no tenki halo intervensaun ho urjenti. Enkontru ida ne’e rasik realiza iha sala enkontru Gabinete PAM nian.

Iha enkontru ne’e, Diretór Ezekutivu ADN,I.P halo introdusaun ba objetivu husi vizita mai iha munisipiu no mós halo enkontru ida ne’e relasiona ho programa atu halo melloramentu kondisaun infra-estrutura saúde no edukasaun nian.

“ Agradese tebes ba Prezidente nia tempu, atu hato’o de’it katak objetivu husi audensia ho prezidente ida ne’e relasiona ho programa atu halo melloramentu kondisaun infra-estrutura saúde,edukasaun nian."Hateten Diretór Ezekutivu ADN,I.P hodi loke enkontru ho PAM Ermera.

Diretór Ezekutivu ne’e hatutan katak, S.E Primeiro Ministru fo orientasaun ba iha Ministru MPIE atu haree mós karik kondisaun eskola ne’ebé atu hadi’a ne’e sei iha, husi fundu Infra-estrutura bele kontinua finansia iha tinan ida ne’e.

“ Sua Exelensia Primeiru Ministru fo orientasaun ne’e mai Sua Exelensia Ministru Planeamentu atu,haree mós karik kondisaun eskola la-di’ak sei iha, husi fundu infra-estrutura bele kontinua finansia iha tinan ida ne’e, ne’e ba, tanba ne’e maka hau simu instrusaun husi Sua Exelensia Ministru Planeamentu, tenta atu hamutuk koordena hamutuk ho ekipa Ministériu Edukasaun no ekipa husi Ministériu Saúde atu mai hamutuk identifika iha kada munisipiu, tanba ne’e ami iha Ermera Autoridade ohin, nune’e, tinan oin karik ita bele responde fila fali prioridade seluk munisipiu nian, depois edukasaun karik tinan ida ne’e depois de ita identifika fundu infra-estrutura bele finansia tan eskola balu ne’ebé maka kondisaun la-di’ak, hau hanoin ita bele halo hahu tinan ida ne’e, tanba ne’e la’os de’it edukasaun, setór saúde mós.” hatutan D.E ADN,I.P iha enkontru ne’e.

Alende infra-estrutura edukasaun, tinan ne’e prioridade mós ba iha setór saúde nian, karik iha suku balu ne’ebé maka asesu ba infra-estrutura saúde ne’e do’ok no karik suku balu seidauk hetan postu sa’ude, entaun sei koordena hamutuk mós husi ekipa sira ministériu saúde nian no liu husi finansiamentu husi infra-estrutura sei konstrui tan postu saúde.

Dadus sira ne’ebé ekipa identifika ne’e rasik, sei aprezenta ba iha KAFI iha fulan marsu tinan ida ne’e, hodi hetan desizaun ba implementasaun no finansiamentu.

Entertantu, Prezidenti Autoridade Munisipiu Ermera, iha nia intervensaun iha enkontru ne’e hateten katak, enkontru ida ne’e importante tebes, no di’ak tebes, tanba ADN bele azuda, liu husi ministeriu saúde no Edukasaun.

“Enkontru ne’e importante lós, di’ak tebtebes, ADN bele azuda liu husi Ministériu Saúde ho edukasaun para bele haree buat ne’ebé maka tama iha kategoria emerzensias ne’e.” hateten PAM Ermera iha enkontru ne’e.

Termina tiha enkontru koordenasaun servisu entre ADN,I.P ho Ministériu Saúde, Edukasaun ho PAM, Diretór Ezekutivu hamutuk ho ekipa kontinua kedas tun ba tereñu hodi halo identifikasaun ba Postu Sáude Ermera nian, no kontinua ba haree konsrtrusaun  eskola Pre- Sekundariu Kay Rala Nunutali,Ensinu Baziku Sentru 10 Abril 99 Gleno no mós eskola públiku iha Talimoro. (Media_ADN)