PM Xanana Inagura Sistema Irigasaun iha Laivai
- Publika husi: Maximiano
- Loron: 09/Jan/2026
Projetu Irigasaun ida ne’e rasik inagura direita husi Primeiru Ministru RDTL S.E Kay Rala Xanana Gusmão. Sistema irigasaun ida ne’e rasik sei fornese bee bá natar hamutuk hektares 500 iha suku Ililai no suku Euquisi.
Iha nia intervensaun Primeiru Ministru RDTL ne’e kontinua enkoraza populasaun sira ne’ebé sai benefisiariu ba irigasaun ida ne’e liliu agrikultór sira atu kuidadu irrigasaun ne’e ho di’ak no bele utiliza hodi hasa’e produsaun hare iha rai laran no bele ona redus importasaun.
Oportunidade hanesan, Ministru MAPPF S.E Marcos da Crúz iha nia intervensaun halo mós esplikasaun ituan relasiona ho prosesu konstrusaun projetu ne’e, nia haktuir katak dezeñu bá irrigasaun lubuk ida inklui irrigasaun Laivai halo kedan desde tinan 2015.
Prezidente Autoridade Munisipiu Lautem Sr. Mélio de Jesus iha nia intervensaun hato’o agradese bá Governu ida ne’e tanba konsege finaliza ona projetu ne’e no ohin halo inaugurasaun.
PAM Lautem espresa mós nia kontente tanba Governu ida ne’e através MAPPF kria kondisaun bá populasaun sira iha Lautém liuliu ba suku rua ne’e (Ililai no suku Euquisi) hodi nune’e ativa hikas fali halo natar hektares atus-resin ne’ebé maka durante ne’e abandonadu iha tinan barak nia laran.
Aleinde halo inagurasaun ba sistema irigasaun ne’e, iha oportunidade hanesan MAPPF liu husi Primeiru Ministru RDTL intrega mós tratór fila rai nian bá agrikultór sira inklui mákina kuda haree no mákina ko’a hare hodi nune’e bele uza hodi halo servisu di’ak liu-tán.
Projetu ida ne’e rasik responsabiliza husi Kontratór Xina ho naran CICO no Jenetbi Gumer.Lda sosiu ho PT Wahana ADYA Indonézia núdar konsultór ho totál Orsamentu bá projetu ne’e hamutuk $9,361,964.36. (MEDIA_ADN)
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;