Dili, 14/01/2026. Diretór Ezekutivu ADN,I.P Eng. Januario Maia Guterres akompaña husi Diretór Adjuntu ADN, I.P Eng. Demistocles G.X.F. Cabral, Koordenadór UAP Arq. José Fernando Liu Soares no mós Assesóra Téknika Nasionál Sra. Melenia da Costa Barros simu vizita badak husi ekipa Banku Dezenvolvimentu Aziátiku (ADB-Sigla Inglés) iha knár fatin Diretór Ezekutivu ADN,I.P nian, iha Hudi laran, Dili,Timor-Leste.

Diretór Adjuntu ADN,I.P Eng. Demistocles G.X.F. Cabral hafoin remata enkontru ho ekipa husi ADN, ba Media ADN hateten katak Iha vizita badak ida ne’e, parte Banku Dezenvolvimentu Aziátiku (ADB-Sigla Inglés) liu husi nia konsultór sira hamutuk ema nain neen (6) mai hasoru ADN hodi husu informasaun balu ba ADN relasiona ho Padraun sira ne’ebé maka ADN utiliza.

“ ADB sira ne’e mai hasoru ADN,I.P hodi koordena ho ADN,I.P no mós husu informasaun ba ADN,I.P kona-ba padraun sira ne’ebé maka ADN,I.P uza hodi halo verifikasaun ba projetu sira no mós kona-ba projetu sira ne’ebé maka ADN implementa ka halo ona relasiona ho servisu sira saude nian (Konstrusaun Klinika, rezidensia ba Mediku sira, Ospital).” Hateten Diretór Adjuntu ADN,I.P Eng. Demistocles G.X.F. Cabral ba Media ADN

Ekipa sira husi ADB nian mai husu informasaun hirak ne’ebé sita ona iha leten ba ADN tanba ADB atu azuda Governu Timor-Leste hodi harii Ospital ida iha munisipiu Viqueque.

ADB maka banku dezenvolvimentu multilaterál ida ne'ebé maka suporta kreximentu inkluzivu, reziliente, no sustentável iha Ázia no Pasífiku tomak. Serbisu hamutuk ho ninia membru no parseiru sira hodi rezolve dezafiu kompleksu sira hamutuk, ADB aproveita ferramenta finanseira inovativu sira no parseria estratéjiku sira hodi transforma moris, harii infraestrutura ho kualidade, no salvaguarda ita-nia planeta. Harii iha tinan 1966, ADB na’in hosi membru na’in 69—na’in 50 hosi rejiaun ne’e. (Media_ADN)