Baucau, 10/01/2026. Projetu reabilitasaun estrada ne'ebé liga husi área Caravela ba Caicido no Aeroportu Baucau  hetan inaugurasaun husi Primeiru Ministru Kay Rala Xanana Gusmão. Estrada ida ne’e Liga pontu sira hanesan JCT. A01 Caravela, Caicido, to'o Aeroportu Baucau.

Iha nia diskursu, Primeiru Ministru apela ba utilizadór estrada sira no mós komunidade sira atu kontinua tau matan ba estrada ne’ebé maka inagura daudaun ne’e.

“ Ne’e imi nian, tanba ne’e hamutuk tau matan ba, baihira haree estrada ne’e foer, tenki bolu malu hamutuk hamoos, imi hotu, liliu joven sira tengki senti katak estrada ne’e imi nian no la-bele estraga sasan sira ne’ebé maka monta iha estrada ne’e.” Hateten Primeiru Ministru iha nia diskursu badak.

Iha fatin hanesan, Ministru MPIE S.E Gastão Francisco de Sousa iha nia diskursu hato’o esplikasaun relasiona ho  planu rehabilitasaun estrada husi Cairavela, Caicido to’o Aeroportu Baucau.

“ Estrada ne’e rasik hahu kedas husi mandatu V Governu Konstitusionál no implementa iha VI Governu iha tinan 2015 ho orientasaun husi MPIE S.E Kay Rala Xanana Gusmão no kompostu husi pakote rua, maibé depois paradu no hahú hikas iha tinan 2025 nune’e inaugura ohin.” Hato’o husi Ministru MPIE S.E Gastão Fransisco de Sousa.

Ministru MPIE iha nia intervensaun ne’e kontinua husu bá autoriedade munisipál no populasaun atu kuidadu didi’ak estrada ne’e nu'udár investimentu ne'ebé sei fó benefísiu bá area oin-oin iha munisípiu Baucau no munisípiu sira iha parte Leste.

Iha fatin hanesan, PAM Baucau Sra. Veneranda E. M. Lemos Martins lori komunidade nia naran hato’o agradesimentu ne’ebé boot no klean ba Governu sentrál ne’ebé maka kontinua finaliza obra ida ne’e.

“ lori komunidade nia naran hatoo agradese ba IX Governu Konstituisionál liu husi MPIE ne'ebe kontinúa obra ida ne'e, ohin loron bele inagura rehabilitasaun estrada hodi fó asesu ba komunidade sira, ami fo nafatin ami nia bemvindos ba governu sentral ami husu nafatin ba governu sentral tau matan nafatin mai ami liu-liu ba estrada urbana ninian ne’ebe durante ne’e ami hotu hein.” Hateten PAM Baucau iha nia diskursu.

Projetu Rehabilitasaun Estrada ne’e hala’o lansamentu hatúr fatuk da-huluk iha loron 11 fulan Janeiru tinan 2025 husi Ministru Planeamentu no Investimentu Estratéjiku (MPIE), Eng.Gastão Francisco de Sousa.

Projetu rehabilitasaun estrada ne'e, aprova ho orsamentu milliaun $ 6 husi Ministériu MPIE liu husi Konsellu Administrasaun Fundu Infrastrutura (KAFI) no hetan verifikasaun, fiskalizasaun no suprevizaun tomak husi Ajénsia Dezenvolvimentu Nasionál (ADN, IP) no hetan kolaborasaun ho Autoriedade Munisípiu Baucau.

Projetu ida ne’e, Ministériu Planeamentu Investimentu no Estratéjiku (MPIE) maka nu'udar na'in ba projetu (owner), no Agência de Desenvolvimento Nacional, IP (ADN, IP) mak halo monitorizasaun no teste kualidade. Kompañia Jova Construction maka responsabiliza ba troxu prinsipal. Kompañia sira seluk hanesan DVP Unipesoál Lda no Central Hill mós involvidu iha seksaun balun. (Media_ADN)