Dili, 20/01/2026. Diretór Adjuntu ADN,I.P Eng. Demistocles G.X. F. Cabral akompaña husi Koordenadór UCVQ Arq. Francisco Xavier de Deus Jerónimo, Assesora Téknika ADN no mós Enjeñeru ADN hala’o enkontru ho ekipa sira husi ADB no mós husi Sekretariadu Grande Projetus (SGP). Enkontru ida ne’e realiza iha sala enkontru Gabinete Diretór Ezekutivu ADN,I.P.

Enkontru ida ne’e hodi halo diskusaun kona-ba esbolsu Padraun Prosedimentu Operasionál (S.O.P-Sigla Inglés) ba projetu sira ne’ebé maka finansia husi fundus imprestimeu ADB nian.

Entertantu ADB mai halo diskusaun ho ADN tanba ADN nia Papél fundamentál maka garante kontrolu kualidade no fiskalizasaun rigoroza ba projetu infraestrutura sira iha rai-laran, hahú hosi planeamentu to’o ezekusaun, hodi garante katak obra públika sira tuir padraun tékniku no fó benefísiu ba dezenvolvimentu nasionál.

Iha oportunidade ne’e, Diretór Adjuntu ADN,I.P iha nia intervensaun husu buat rua ba ekipa sira husi ADN maka hanesan; husu ADB atu konsidera lei sira kona-ba infraestrutura ne’ebé maka vigór iha Timor Leste no husu mós ba ADB karik bele fasilita treinamentu ba enjeñeru sira husi ADN,I.P nian. Diretór Adjuntu mós iha oportunidade ne’e halo esplikasaun ba ADB relasiona ho papel ADN,I.P nian ba implementasaun projetu sira ne’ebé maka finansia husi imprestimu ADB nian. (Media_ADN)