Dili, 16/12/2025. Diretór Ezekutivu ADN,I.P Eng. Januario M. Guterres akompaña husi Diretór Adjuntu ADN,I.P Eng. Demistocles G.X. F. Cabral no mós Koordenadór sira husi ADN,I.P partisipa iha enkontru extraordinariu Konsellu Administrasaun Fundu Infraestrutura (KAFI) ne’ebé maka hala’o iha Sala Reuniaun Gabinete Ministru MPIE, Fatuhada, Dili, Timor-Leste.

Enkontru KAFI ida ne’e iha parte primeiru halo aprovasaun ba azénda sira ba assuntu importante sira ne’ebé maka nesesidade hodi foti desizaun emidiata husi KAFI ne’ebé maka téknikamente ténki deskute iha nivél Pre-KAFI.

Iha biban ne’e mós Sekretariadu Grande Projetu (SGP) halo atualizasaun pre-reuniaun KAFI sira ne’ebé maka halo ona, no azénda KAFI sei atualiza nafatin bazeia ba koordenasaun, diskusaun tékniku no mós dokumentus justifikativu sira husi projetu na’in.

Iha parte segundu enkontru KAFI nian ne’e halo mós diskusaun no rekomendasaun ba pedidu aprovasaun no autorizasaun KAFI kona-ba projetu rehabilitasaun Highway Ezistente ne’ebé maka aprezenta husi Ministériu MPRM S.E Fransisco da Costa Monteir, hafoin ne’e tuir kedas ho pedidu aprovasaun no autorizasaun despezas ba projetu mudansa orsamentu husi Loan ba FI ba projetu Aeroportu no National Internet Data Exchange no National Data Center. Pedidu ida ne’e rasik mai husi Ministériu Transporte no Komunikasaun (MTK).

Entertantu, Reuniaun KAFI ida ne’e rasik lidera direita husi Prezidente KAFI no Atúal Ministru MPIE S.E Eng. Gastão Fransisco de Sousa no marka mós prezensa husi membru KAFI sira maka hanesan, Ministru Obras Públika S.E Samuel Marçal, Ministru Transporte no Komunikasaun S.E Eng. Miguel Marques Gonçalves Manetelu, inklui partisipa mós husi Dirizente sira husi SGP, CNA no Assesór sira. (Media_ADN)