Viqueque, 06/10/2025. Ekipa husi Ajénsia Dezenvolvimentu Nasionál (ADN) reprezenta husi Xefi Departamentu Estandarizasaun, Sr. Aleixo Andrade no mós enjeñeiru sira husi ADN ne’ebé maka destaka iha munisipiu Viqueque partisipa iha serimonia Lansamentu ba Ponte Welolo ne’ebé hala’o iha loron 03/10/2025 liu ba iha Postu Administrativu Viqueque Villa.

Lansamentu ba Ponte Welolo ne’e rasik hala’o husi Primeiru Ministru RDTL, S.E Kay Rala Xanana Gusmão ne’ebé maka akompaña husi Ministru Obras Públika S.E Samuel Marçal, Vise Ministru Asuntu Parlamentar S.E Adérito Hugo da Costa no akompaña mós husi Prezidente Autoridade Munisipiu Viqueque Sr. Francisco C.S de Gonzaga Soares.

Ponte WeLolo sei fó benefísiu boot ba komunidade lokál no reziaun tomak hodi Asesu no Konektividade, fasilita movimentu ba eskola, sentru saúde, fasilitasaun transportasaun produtu agrikultura, Fortalese ligasaun entre komunidade rurál no sentru urbanu no seluk tan.

Lansamentu Fatuk Dahuluk Ponte We-Lolo reprezenta la’os de’it projetu infraestrutura, maibé kompromisu konkretu IX Governu Konstituisionál nian ba dezenvolvimentu balansu iha territóriu nasionál tomak. Projetu ida ne’e ne’e sei halo durante loron 365, ho investimentu totál $4,398,863.24.

Hafoin halo tiha lansamentu ba Ponte We-Lolo, iha loron tuir mai (04/10/2025) Primeiru Ministru RDTL S.E Kay Rala Xanana Gusmão halo mós Lansamentu hatúr fatúk da-uluk ba estrada Luca, Raihun to’o Dilor iha Postu Administrativu Lacluta, Munisipiu Viqueque. (Media_ADN)