Dili,14/07/2025. Diretór Ezekutivu Interinu Ajénsia Dezenvolvimentu Nasionál (ADN) akompaña husi tékniku ADN destakadu iha munisipiu Covalima no mós Assesór Tékniku Nasionál ADN Sr. Gui Daniel T de Jesus iha loron Sexta feira (11/07/2025) liu ba, partisipa iha lansamentu hatúr fatuk da-huluk ba rehabilitasaun estrada iha Postu Administrativu Maucatar Munisipiu Covalima.

Projetu rehabilitasaun Estrada ida ne’e lansa direita husi Primeiru Ministru RDTL S.E Kay Rala Xanana Gusmão ne’ebé akompaña mós husi Ministru Obras Publika S.E Sr. Samuel Marçal, partisipa mos husi Vise Minístru Infraestrutura- Julio do Carmo, Sekretario Estadu Asunto Toponomia e Organizasaun Urbana (SEATOU)- Germano Santa Brites, Prezidente Autoridade Municipiu Covalima, Miguel Armada Cardoso, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, reprezentante husi liñas ministeriais relevante sira, Administradór Postu Maucatar,Xefe suku husi suku (4), Amo Paroku, Madre sira, Estudante, Komunidade , no konvidadu sira seluk.

Hafoin halo tiha lansamentu liu husi hatur fatuk da-uluk, kontinua hika'as ho selebrasaun asina kontratu entre Ministru Obras Publiku ho kompana sira ne'ebe maka sei implementa projetu rehabilitasaun estrada ida ne'e.

konstrusaun ka rehabilitasaun estrada iha Postu Administrativu Maucatar ne’e husi suku Ogues ba iha Leogore ho kilometru 10 ne’ebé kompaña JLC Lda ne’ebé maka sosiu ho kompaña Dany Star Unipesoál Lda maka sei responsabiliza no rehabilitasaun estrada ida ne’e sei hahù iha fohorua to’o ba iha leogore Postu Maucatar ho kilomentru hitu (7) , durasaun tempu ba konstrusaun durante fulan 18 ho montante kontratu orsamentu $ 3,101,895.22.

Enkuantu projetu rehabilitasaun estrada husi fohorua suku Ogues, leogore no suku Holpilat Postu Maucatar sei responsabiliza ba implementasaun husi kompaña Dany star Unip Lda ne’ebé maka sosiu ho DMF unipesoàl Lda, durasaun kontratu durante fulan 12 ho ninia montante kontratu maka $ 2,420.446.93. (media_ADN)