Díli, 27 Juñu 2025. Xefi Departamentu ITI–ADN, Eng. Remígio da Costa Soares dos Santos, akompaña husi Xefi Departamentu Laboratóriu ADN, Eng. Ambrósio M. Nuno, Asesór Tékniku Eng. Diogo A. Pereira, tekniku husi Laboratóriu ADN, no tekniku ADN sira ne’ebé destaka iha Munisípiu Baucau, hala’o enkontru koordenasaun servisu mensál ho kompaña sira ne’ebé responsável implementasaun projetu iha munisípiu refere.

Enkontru ne’e fó fatin ba interkambiu informasaun ho diskusaun kona-ba dezenvolvimentu no desafius ba implementasaun projetu rehabilitasaun estrada Caravela – Caicido – Aeroportu, ne’ebé implementa husi kompaña DVP Construção Unipessoal Lda no Central Hill Unipessoal Lda.

Enkontru koordenasaun mensál ida ne’e importante tebes hodi nune’e permite ekipa monitoriza no avalia dezempeñu ba periodu fulan kotuk, bele ajuda unifika informasaun, evita mis-komunikasaun, no fortifika kolaborasaun efetiva entre ADN, kontratór, no komunidade lokal, hodi garante implementasaun projetu ne’ebé efisiente no transparente.(MÉDIA_ADN)