Dili,23/05/2025. Objetivu prinsipál husi enkontru mensál ho kontratór sira mak atu avalia progresu projetu nian, diskute dezafiu ka kestaun ruma ne’ebé mosu, no asegura katak parte hotu-hotu ne’ebé envolve nafatin iha dalan loos atu atinje alvu projetu nian. Sorumutu ne’e mós sai nu’udar meiu ida ba komunikasaun, koordenasaun no aliñamentu husi parte hotu-hotu ne’ebé envolve iha projetu ne’e.

Objetivu espesífiku sira hosi enkontru mensál sira ho kontratór sira:

Avaliasaun Progresu:

Kompara progresu fíziku projetu nian ho oráriu no planu serbisu ne'ebé konkorda ona.

Identifikasaun ba problema sira:

Diskute problema potensiál, obstákulu, ka dezafiu sira ne'ebé bele mosu durante implementasaun projetu.

Foti desizaun:

Diskute solusaun ba problema sira ne'ebé mosu, planu asaun koretiva sira, no foti desizaun sira ne'ebé nesesáriu atu kontinua projetu.

Aliñamentu Komunikasaun:

Asegura parte hotu-hotu ne'ebé envolve iha komprensaun hanesan kona-ba estatutu projetu nian, dezafiu sira ne'ebé hasoru, no planu serbisu sira ne'ebé sei mai.

Monitorizasaun ba Kustu:

Avalia orsamentu no despeza sira projetu nian hodi asegura katak projetu ne'e mantein iha limite orsamentu nian ne'ebé estabelese ona.

Avaliasaun Kualidade:

Asegura katak kualidade serbisu nian tuir padraun sira ne'ebé estabelese ona.

Kontrolu Risku:

Identifika risku potensiál sira no planu estratéjia sira ba mitigasaun risku nian.

Kontrolu ba Mudansa:

Diskute no konkorda kona-ba mudansa sira ne'ebé bele presiza durante implementasaun projetu.

Hadi'a Dezempeñu:

Identifika área sira atu hadi'a hodi hasa'e efisiénsia no produtividade projetu nian.

Preparasaun Relatóriu:

Prepara relatóriu mensál sira ne'ebé kobre progresu projetu nian, kestaun sira ne'ebé identifika ona, no solusaun sira ne'ebé foti ona.

Importansia husi enkontru mensál ne'e rasik ho nune’e maka ADN liu husi Diretór Ezekutivu Sr. Rui Lourenço da Costa, Adjuntu Diretór Ezekutivu ADN Eng. Januario M.Guterres no kargu Xefia sira no akompaña husi ekipa tékniku no Assesór Tékniku Nasionál ADN no Assesór tekniku Internasionál realiza enkontru ho kompaña no konsultór sira ne’ebé maka daudaun ne’e implementa hela projetu iha teritoriu Timor-Leste laran no enkontru ne’e realiza iha fatin enkontru Sekretariadu Grandes Projetus nian iha Hudi Laran,Dili.

Durante enkontru,parte konsultór no kontratór informa mós ba ADN relasiona ho sabotazén ne'ebé maka komete husi komunidade balu ne'ebé maka besik ba skema irigasaun Galata Baucau ho maneira sulan metin ka taka metin tiha kanál Irigasaun no difikulta bee la'o ho normal hodi fornese bee ba komunidade sira nia natar.

Hafoin rona tiha informasaun ne'e Diretór Ezekutivu ADN husu atu komunidade sira bele koopera ho di’ak no hamutuk hodi tau matan no kuidadu ba obras sira ne’ebé maka governu halo tanba ne’e uza povu nia osan,nasaun nia osan no ba povu nia di'ak. Ho hakraik án Diretór Ezekutivu ne’e husu atu hotu-hotu hamutuk tau matan nafatin ba obra sira ne'e.

Aleinde informasaun iha leten ne'e,ADN rona mós informasaun sira seluk husi kontratór relasiona ho implementasaun projetu sira ne’ebé maka la'o tarde kauza husi iklima (Udan), menus traballadór ka traballadór ne'ebé la balansu no la kualifikadu, problema sosiál no seluk tan.

Kontratór no konsultór ne'ebé maka Partisipa enkontru mensál ho ADN ne'e maka hanesan: China Civil Engineering Construction Corporation (CCECC) ne'ebé maka implementa projetu konstrusaun Skema Irigasaun Galata iha Munisipiu Baucau; PT. MINARTA DUTA HUTAMA ne'ebé maka implementa projetu konstrusaun skema Irigasaun Maliana II; CHONGQING INTERNATIONAL CONSTRUCTION CO.Ltd (CICO) ne'ebé maka implementa projetu konstrusaun skema Irigasaun foun iha munisipiu Lautem; China Civil Engineering Construction Corporation (CCECC) ne'ebé maka implementa projetu konstrusaun ba sala Pediatria no ICU; PT. Persada Mas Raya (PMR) sosiu ho ALGIS ne'ebé maka implementa projetu konstrusaun foun edifisiu E-Recruitment. Entertantu nain ba projetu sira n'ee hotu maka mai husi parte Ministériu Agrikultura, Ministériu Saúde no INAP.

Haktuir ba orariu ne’ebé maka iha (23/005/2025) enkontru mensál ne'e sei kontinua mós ho konsultór no kontratór sira seluk ne'ebé maka daudaun ne’e implementa hela projetu iha tereñu. (Media_ADN)