Dili,08/04/2025. Koordenadora Unidade Jestaun Administrativu Sra. Amelia da Costa akompaña husi Xefi Departamentu Administrasaun no Finansas Sra. Angela M.E Correira, Assesór Junior Planeamentu no Monitorizasaun Sr. Luciano da Silva no mós Ofisiál Planeamentu no Monitorizasaun Sr. Aquelino Soares Ferreira partisipa iha serimonia lansamentu Aplikasaun Telemovél (Mobile APP INSS) Institutu Nasionál Seguransa Sosiál ne’ebé maka realiza iha Salaun Multifunsaun GMN.

Institutu Nasional Seguransa Sosial kria iha 2016 (Dekretu-Lei nú. 47/2016, loron 14 fulan-Dezembru), nu'udar órgaun sentrál ba jestaun no ezekusaun sistema seguransa sosiál tomak no siklu prosesu asosiadu tomak, inklui atendimentu ba kliente, rejistu dadus (rejistu, benefisiu no kareira kontributiva), objetivu maka atu garante kondisaun moris ne'ebé dignu no asesu ba servisu no kuidadu esensial sira, la haree ba rekursu sira no situasaun kona-ba empregu no merkadu traballu.

Iha tinan 2008, kria nivel dahuluk protesaun nian, relasiona ho rejime seguransa sosial la kontributivu, ne'ebé materializa husi benefisiu sosiál ida ne'ebé diriji ba idozu sira no sidadaun sira ho idade legál iha situasaun inkapasidade permanente no definitiva ba serbisu.

Rejime jerál hanesan ona rejime kontributivu efetivamente, ne'ebé asosia direitu (ba benefisiu sira) ho devér sira (hodi kontribui), no habelar protesaun ba traballadór hotu-hotu, iha setór hotu-hotu atividade nian, fö mós protesaun iha kazu inan-aman nian no ho planu atu habelar iha futuru ba protesaun hasoru risku sosiál sira seluk.

Nivel daruak ida-ne'e fo protesaun boot liu ba sira ne'ebé serbisu no kontribui ba rejime kontributivu, atu nune'e bele garante manutensaun ba sira-nia padraun moris hafoin reforma ka durante sira-nia vida traballu, iha situasaun lakon rendimentu hosi serbisu (ezemplu, durante maternidade). Maibé, iha rejime tranzitóriu ne'e diriji eskluzivamente ba traballadór sira Estadu nian, inklui de' it pensaun sira (idade ferik-katuas, defisiensia no sobrevivente sira) no finansia mós hosi Orsamentu Administrasaun Sentrál Estadu nian, lahó kontribuisaun sira ne'ebé maka kria loloos.

Tanba ne'e, importante mós atu garante katak sira ne'ebé kontribui sempre iha asesu ba pensaun (idade ferik-katuas no defisiensia) ho valór aas liu duké pensaun sosial, atu nune'e bele valoriza no rekoñese esforsu kontribuisaun nian. Tanba ne'e, kria ona pensaun minimu tranzitóriu ida no, iha tinan 2022, Governu aprova mós kriasaun hosi valór sira pensaun minimu nian ba benefisiáriu sira hosi rejime kontributivu seguransa sosiál nian.

Ho esplikasaun badak iha leten kona-ba saida maka seguransa sosiál no nia importansia sira nune’e maka INSS esforsu kria Aplikasaun Mobile (MOBILE APP) ida ne’e  ho objetivu atu hakbesik an ba  sidadaun tomak ho maneira ne’ebé simples no fasil liu tan. Aplikasaun  ida ne’e rasik lansa direita husi Primeiru Ministru RDTL S.E Kay Rala Xanana Gusmão.

Entertantu Aplikasaun Mobile INSS ne’e rasik bele ona download husi Play Store kada mobile sidadaun nian tantu Android no mós IOS. (Media_ADN)