Dili, 07/04/2025. Tékniku ADN ne’ebé maka destaka iha munisipiu kontinua halo monitorizasaun ba projetu sira ne’ebé maka implementa hela iha tereñu, Monitorizasaun projetu konstrusaun ne’e  maka núdar  prosesu monitorizasaun ba progresu projetu ida nian hodi nune’e asegura katak katak projetu ne’ebé mak implementa ne’e la’o tur duni  dalan loos iha termu oráriu, orsamentu, no kualidade. Avaliasaun sira hala'o periodikamente hodi nune’e bele detekta obstákulu sira atu nune'e ekipa jestaun bele foti asaun koretivu.

Monitorizasaun ba projetu ne’e importante tebes tanba ne’e mak tékniku sira ne’ebé destaka iha munisipiu sira nafatin tun ba tereñu hodi halo monitorizasaun. Hanesan tékniku ADN ne’ebé maka destakadu iha munisipiu Bobonaro halo monitorizasaun ba projetu Kazérnas no Parazén iha Maliana no projetu ida ne’e husi kompaña Guan Sha Unipesoál Lda.

Iha oportunidade hanesan, tékniku ADN destakadu iha munisipiu Bobonaro ne’e halo mós monitorizasaun ba projetu konstrusaun Postu UPF, TL-PDP melloramentu ba edifisiu iha Oe Detan, ne’ebé maka implementa husi kompaña Masjo Unipesoál Lda iha Tunubibi iha Munisipiu Bobonaro.

Tékniku ADN destakadu munisipiu Bobonaro hirak ne’e halo mós monitorizasaun ba projetu Rehabilitasaun postu UPF iha Nunura ne’ebé maka implementa husi kompaña Kay Xander Amor Unipesoál Lda iha munisipiu Bobonaro. Halo mós monitorizasaun ba projetu konstrusaun postu UPF ,TL-PDP ba melloramentu Edifisiu ne’ebé maka implementa husi kompaña Taloubu Leo Besi Unipesoál Lda iha Balibo, Munisipiu Bobonaro.

Iha parte seluk, tékniku ADN sira ne’ebé destaka iha munisipiu Dili mós halo monitorizasaun ba projetu konstrusaun Supervizaun ba konstrusaun foun baraka F-FDTL nian iha Metinaro.

Husi munisipiu Aileu tékniku ADN ne’ebé maka destaka iha Aileu halo monitorizasaun ba konstrusaun EP Aidelun Seloi Malere ne’ebé maka implementa husi kompaña Aitarica Unipesoál Lda ne’ebé maka lokaliza iha munisipiu Aileu.