Dili, 20/03/2025. Diretór Ezekutivu ADN Sr. Rui Lourenço da Costa hamutuk ho Adjuntu Diretór Ezekutivu ADN Eng. Januario M. Guterres no akompaña mós  husi Koordenadór sira no mós Assesór  Tekniku Nasionál AND nian partisipa iha enkontru alargadu entre Cãmara de Comércio e Industria de Timor-Leste (CCI-TL) ho Ministériu Planeamentu no Investimentu Estratéjiku (MPIE) ne’ebé maka realiza iha Salaun Multiuzus-GMN.

Ministru MPIE S.E Eng. Gastão Fransisco de Sousa iha nia intervensaun hato’o nia apresiasaun ba CCI-TL ne’ebé maka organiza sorumutu importante ida ne’e, Ministru ne’e hatutan katak IX Governu Konstitusionál tau setór Privadu hanesan parseiru importante ida ba Governu. Kontribuisaun seitór Privadu ba kresimentu ekonomiku, kriasaun kampu traballu urjenti, importante tebes.

Iha nia intervensaun, Ministru MPIE haktuir mós katak programa Governu hatudu katak Governu nia komprimisu hodi promove setór privadu ida ne’ebé iha kapasidade, nune’e maka bele kria kampu traballun ba joven sira ho nune’e povu bele hetan moris di’ak. Atu promove seitór Privadu governu planea ona atu harii Banku Dezenvolvimentu Nasionál hanesan temi ona iha programa governu nian. Hatutan husi Ministru MPIE iha nia intervensaun.

Governante ne’e hateten mós katak governu apelu ba emprezariu sira, liu-liu emprezariu Timoroan sira wainhira hetan kontratu projetu tengki hala’o ho responsabilidade, kualidade no labele abandona projetu estadu nian ne’ebé maka sira hetan. Ministru  MPIE haktuir katak, mensazén Primeiru Ministru nian sempre ko’alia kona-ba seitór privadu katak tengki promove seitór Privadu Timoroan hodi kontribui ba dezenvolvimentu Nasionál.

Iha fatin hanesan Diretór Ezekutivu ADN Sr. Rui Lourenço da Costa iha nia intervensaun hato’o obrigadu ba oportunidade ida ne’e, no nia parte espera katak ho reuniaun ida ne’e, hotu-hotu bele deskuti ho di’ak, ho frakeza, ho abertura, la-iha hirus malu, depois de sai husi ne’e (Salaun Multiuzu-GMN) la-iha odiu malu, no Diretór Ezekutivu ne’e husu mós atu ADN sira mós la-bele halo impedimentu ida para depois  pedidu pagamentu sira sai keleur se karik sira impede, iha Ministru iha ne’e,no Diretór Ezekutivu ADN iha ne’e ADN nian odamatan  nakloke nafatin para bele rona malu.

Diretór Ezekutivu ADN haktuir mós katak dialogu sira hanesan ne’e importante tebes, para bele hetan solusoens, tanba importansia sira maka bai-bain Ministru sempre hateten estadu ida ne’e ninia susesu iha ita hotu-hotu nia liman,entaun dialogu para ita bele hetan solusaun.

Iha oportunidade ne’e, ADN liu husi Koordenadór Unidade Estudus no Dezenvolvimentu Kompetensias (UEDC-Sigla Portugés) Sr. Demistocles G.X F. Cabral halo mós aprezentasaun ida relasiona ho Presu Unitariu (Unit Price) no termina aprezentasaun ne’e kontinua kedas ho sesaun husu no hatan.

Entertantu tema prinsipál iha enkontru alargadu entre Cãmara de Comércio e Industria de Timor-Leste (CCI-TL) ho Ministériu Planeamentu no Investimentu Estratéjiku (MPIE) ne’e maka “ Ho Esperitu no Kolaborasaun Di’ak Ita Bele Alkansa Infraestrutura ho Kualidade no Reziliente.

Partisipantes sira iha enkontru ne’e mak Ministru MPIE, Diretór Ezekutivu ADN ho estrutura, Diretór Ezekutivu CNA ho estrutura, Prezidente CCI-TL hamutuk ho estrutura, Assesór no Assesora Nasionál ho Internasionál  sira husi MPIE,ADN no CNA, no mós emprezariu sira. (Media_ADN)