Dili, 12/03/2025. Se la iha monitorizasaun ba projetu konstrusaun edifisiu ka Estrada (Konstrusaun Fiziku) ida ne’e sei halo projetu ne’e iha poténsia atu hetan obstákulu, atrazu, no até fallansu tanba falta supervizaun no monitorizasaun ba progresu serbisu no utilizasaun rekursu.

La ho monitorizasaun ne’ebé detallu maka sei susar atu identifika problema sira ne'ebé mosu sedu no foti asaun koretivu, ida ne’e bele atraza projetu sira.

Falta monitorizasaun bele hamosu rekursu sira ne'ebé maka estraga (materiál sira, forsa traballu, tempu) no aumentu kustu sira ne'ebé la espera.

La ho kontrolu kualidade ne'ebé rigorozu, produtu finál projetu ida nian bele la prienxe planu no espesifikasaun sira, hodi hamosu problema sira iha tempu tuirmai.

Monitorizasaun ajuda iha foti desizaun proativu no tuir dezenvolvimentu projetu nian, La ho monitorizasaun ne'ebé efetivu, risku ba fallansu projetu aumenta tanba inserteza iha ezekusaun serbisu no utilizasaun rekursu.

Projetu konstrusaun sira hanesan setór ida ne'ebé importante iha dezenvolvimentu infra-estrutura ne'ebé suporta kreximentu ekonómiku no bem-estar públiku. Maibé, kompleksidade husi prosesu ne'ebé envolve parte interesada barak, rekursu sira, no limitasaun tempu no orsamentu halo jestaun projetu konstrusaun sai dezafiu ida boot.

Supervizaun no kontrolu kualidade maka komponente rua integrál iha jestaun projetu konstrusaun nian ne'ebé garante katak Faze ida-idak hosi projetu ne'e hala'o tuir padraun sira ne'ebé estabelese ona, determina ona.

Monitorizasaun projetu nian ho objetivu atu monitoriza progresu konstrusaun, asegura katak serbisu la'o tuir oráriu no orsamentu ne’ebé konkorda ona. Prosesu ida-ne'e envolve verifikasaun monitorizasaun periódiku ba kondisaun kampu no monitorizasaun ba atividade sira tempu reál.

Importansi husi supervizaun no kontrolu kualidade ida ne’e maka tékniku ADN sira ne’ebé maka destakadu iha munisipiu sira hotu iha teritoriu Timor Leste inklui RAEOA no Atauro, rutina halo monitorizasaun ba projetu sira ne’ebé maka daudaun ne’e implementa hela ka la’o hela.

Tékniku sira husi ADN ne’ebé maka destaka iha munisipiu Manatuto ba monitoriza Projetu Konstrusaun foun Dormitoriu no Parazén IGEADI ne’ebé maka implementa husi kompaña Alves Amorin Unipesoál Lda iha Barique, Manatuto.

Monitorizasaun ba projetu ne’e halo mós husi tékniku ADN sira ne’ebé maka destaka iha munisipiu Baucau, iha ne’ebé tékniku hirak ne’e tun ba tereñu hodi monitoriza projetu konstrusaun Eskola Ensiñu Sekudaria Jerál Paralelu ne’ebé maka implementa husi Grupu Komunitariu no lokaliza iha Aubaca, Triloka.

Projetu Konstrusaun foun ba portaun entrada nian no mós Jardin Herois iha Ainaro ne’ebé maka implementa husi kompaña Betua calda Unipesoál Lda hetan mós monitorizasaun husi Tékniku ADN sira ne’ebé maka destakadu iha munisipiu Ainaro. Tékniku ADN destakadu iha munisipiu Ainaro ne’e mós halo monitorizasaun ba projetu konstrusaun foun edifisiu, Garajén, no paisajizmu iha munisipiu  Ainaro nebe'e mak implementa husi kompaña Atramor Sucesso unipesoál. Lda.

Atividade monitorizasaun projetu ne’e halo mós husi Ekipa Tekniku AND ne’ebé maka destakadu iha munisipiu Bobonaro. Tékniku hirak ne’e ba monitoriza ba projetu Konstrusaun Foun UMA DIGNU BA POVU iha Maliana, Tunubibi ne’ebé mak implementa husi Kompaña RICS Unipesoál Lda. Aleinde ne’e, tékniku ADN destakadu iha munisipiu Bobonaro, halo mós monitorizasaun ba projetu Konstrusaun Kajernás no Parajén ne’ebé  mak implementa husi Kompaña Ghuang Shan Unipesoál Lda.

Monitorizasaun projetu ne'ebé ajenda ona bele halo semana-semana, fulan-fulan, loro- loron no seluk tan. Iha dalan hanesan ne'e ho intensaun bele evita atu akontense failansu ruma ne’ebé maka susar atu bele hadi’a hikas. (Media_ADN)