info@adn.gov.tl
+670 3310289

ADN Realiza Kickoof Meeting ho Kompaña Implementadór Projetu Rehabilitasaun Estrada iha Munisipiu Baucau

  • Publika husi: Maximiano
  • Loron: 21/Jan/2025

Dili, 21/01/2025. Diretór Ezekutivu ADN Sr. Rui Loureço da Costa akompaña mós husi Koordenadór UCVQ Arq. Fransisco Xavier de Deus Jeronimo, Xefi Departamentu Laboratoriu Eng. Amrósio Martins Nuno,Asesór Nasionál no Internasinál inklui mós tékniku ADN Eng. Rui Lopes hala’o Kickoff meeting ho Kompaña Implementadór ba Projetu Rehabilitasaun Estrada iha Munisipiu Baucau.

Enkontru KickOff meeting ida ne’e núdar enkontru projetu dahuluk entre parte hotu-hotu ne'ebé envolve iha implementasaun projetu. Enkontru ida ne’e realiza hafoin Ministru MPIE S.E Eng. Gastão Fransisco de Sousa iha momentu hira liu ba halo tiha lansamentu no assina kontratu ho kompaña sira ne’ebé maka implementa projetu refere.

Antes ne’e, Primeiru Ministru RDTL S.E Kay Rala Xanana Gusmão husu no fó atensaun bá servidór Estadu bainhira implementa projetu tenke haree didi’ak kualidade no labele gasta de’it osan.

Primeiru-Ministru husu ne’e iha ámbitu avaliasaun reuniaun Konsellu Administrasaun Fundu Infraestrutura (KAFI) ne’ebé partisipa hosi ministériu save sira no Prezidente Autoridade munisipál sira, iha Ministériu Finansas, Aitarak-laran, segunda (20/01/2025) liu ba.

Ho nune’e maka ADN organiza no realiza kedas enkontru kickoff meeting ho kompaña implementadór ba projetu rehabilitasaun ne’ebé maka lokaliza iha munisipiu Baucau.

Jeralmente, enkontru ida ne’e realiza hafoin akordu serbisu ka kontratu entre projetu na'in (MPIE) no implementadór projetu nian asina hosi parte rua.

Iha projetu ho eskala boot, prosesu akordu servisu ka kontratu entre projetu nain (MPIE) no implementadór projetu normalmente hala’o husi ekipa aprovizionamentu ka jestaun Instituisaun ida-idak, maibe ba implementasaun projetu delega ba ekipa implementasaun projetu ne’ebé maka iha ADN. Tanba razaun ida-ne'e, presiza hala'o enkontru projetu inisiál ida ne'ebé envolve parte hotu-hotu ne'ebé envolve iha implementasaun projetu nian hodi hetan komprensaun komún ida kona-ba projetu ne'e.

Assuntu sira ne’ebé maka parte sira diskute iha enkontru kickoff meeting ne’e maka hanesan, Introdusaun ba membru ekipa sira, tantu husi projetu nain no implementadór projetu no mós parte sira seluk ne’ebe involve karik iha, ezemplu karik projetu nain uza konsultor nia servisu hodi hala’o projetu ida ne’e. Parte ida-idak esplika kona-ba estrutura organizasionál ba implementasaun projetu, Esplika badak kona-ba ámbitu projetu nian no papél organizasaun ida-idak nian iha implementasaun projetu no kalendáriu implementasaun projetu nian, Prosedimentu komunikasaun projetu nian, Prosedimentu aprovasaun iha implementasaun projetu, ezemplu se mak submete, se mak halo revizaun, no se mak fo aprovasaun. No mós prosesu ne'e tenke lori tempu hira atu kompleta, Prosedimentu pagamentu, pur-ezemplu dokumentu saida maka tenke kompleta iha prosesu pagamentu no oinsá prosesu pagamentu la'o, Formatu relatóriu ne’ebé tenke halo husi implementadór projetu ba projetu na’in, formatu ne’e saida no karik tenke iha forma relatóriu loron-loron, semana-semana, fulan-fulan ka saida no Buat seluk ne’ebé konsidera nesesáriu tenke hatene no konkorda husi parte sira atu nune’e implementasaun projetu la’o ho di’ak liután.

Entertantu Estrada sira ne’ebé maka lansa ona husi Ministru MPIE atu halo rehabilitasaun maka hanesan; Estrada JCT. A01 Caravela-Caicido-Aeroportu Baucau STA 10+500-STA 18+740, no Projetu rehabilitasaun Estrada Pakote III ho naran projetu rehabilitasaun A01JCT.Triloca-JCT A06, Fatumaca-Loilubu-JCT A06 Venilale Road STA 12+075-18+100 (6.025Km) ne’ebé maka sei responsabiliza husi kompaña Jolitoni Unipessoál Lda ba durasaun tinan ida. Projetu Pakote IV ne’ebé maka ho naran projetu rehabilitasaun Estrada A01.JCT.Triloca-JCT A06, Fatumaca-Loilubu-JCT A06 Venilale Road, STA 18+0125-24+150 (6.025Km) sei responsabiliza husi kompaña  Glory Enterprise ho durasaun tinan ida no Projetu Pakote V ho naran projetu rehabilitasaun A01.JCT.Triloca-JCT A06, Fatumaca-Loilubu-JCT A06 Venilale Road, STA 24+150-30+190 (6.040Km) sei responsabiliza husi kontraktór Golden Way ba durasaun tinan ida. (Media_ADN)

LEMA ADN

  • Aprende hodi halo, halo hodi aprende;
  • Haburas kreatividade no inovativo de servisu;
  • Hametin principiu servisu salva an, salva superior/liders, salva instituisaun no salva nasaun;