info@adn.gov.tl
+670 3310289

Ministru MPIE Lansa Projetu Rehabilitasaun Estrada Triloka, Fatumaka, Loilubu, Venilale no Baucau

  • Publika husi: Maximiano
  • Loron: 16/Jan/2025


Baucau, 17/01/2025. Ministru Planeamentu Investimentu no Estratéjiku (MPIE) S.E Eng. Gastão Fransisco de Sousa akompaña husi Diretór Ezekutivu ADN Sr. Rui Lourenço da Costa no mós Adjuntu Diretór Ezekutivu ADN Eng. Januario M. Guteres inklui Prezidente Autoridade Munisipiu (PAM) Baucau Sra. Veneranda E. M. Lemos Martins halo Lansamentu hatúr Fatúk da-uluk ba Projetu Rehabilitasaun Estrada Triloka, Fatumaka, Loilubu, Venilale no Baucau. Serimonia Lansamentu ida ne’e rasik realiza iha Suku Loi-Lubo, Postu Administrativu Vemase, Munisipiu Baucau Villa.

Molok halo lansamentu ba hatúr fatúk da-uluk iha fatin ne’ebé maka termina ona, uluk nanain Ministru MPIE S.E Eng. Gastão Fransisco de Sousa no mós kompaña implementadór assina uluk kontratu, termina tiha assina kontratu, kontinua kedas ho Lansamentu no hatúr fatúk da-uluk iha lokál ka fatin ne’ebé maka termina tiha ona.

Ministru MPIE iha nia diskursu hateten katak Estrada ida ne’e kontinua tanba Estrada ida ne’e uluk iha Kintu ou Sestu Governu maka hahu halo Estrada ida ne’e no ohin maka hahu fila fali kontinuasaun ba Estrada ida ne’e.

“ Tanba sa maka Estrada ida ne’e ita kontinua,tanba Estrada ne’e uluk iha V ou VI Governu maka ita hahu ho Estrada ida ne’e, ohin ita mai ita hahu fila fali kontinuasaun ba Estrada ida ne’e, ne’e duni ita boot sira lalika agradese,ne’e ami nia dever,ami nia obrigasaun,tanba Ministeriu Planeamentu Investimentu Estratéjiku,haree oinsa,atu investe osan ita nian,povu nian ba áreas ne’ebé importante, tanba ne’e maka ami iha ne’e hodi foti desizaun ida ne’e,ida ne’e importante maka foti desizaun hodi kontinua Estrada ida ne’e, ne’ebé ita boot sira hakarak agradese,agradese ba maun boot, hau la-lika agradese tanba ne’e hau nia dever.” Hato’o husi Ministru MPIE S.E Eng. Gastão Fransisco de Sousa iha nia Diskursu.

Ministru MPIE ne’e husu mós ba kompaña 3 ne’ebé maka responsabiliza ba iha rehabilitasaun Estrada ne’e nia responsabilidade ba rehabilita Estrada ida ne’e tanba durasaun ba rehabilitasaun Estrada ne’e tinan ida deit.

hau hakarak husu deit ba kompaña 3 ne’e, nia responsabilidade ba rehabilita Estrada ida ne’e, tanba ita bot sira iha tinan ida de’it,tinan ida atu hadi’a Estrada ida ne’e,iha ne’e hau hakarak hateten bai ta boot kompaña tolu ne’e, sei la-iha dispensaun ba kontratu, hanoin CNA mós iha ne’e,ADN iha ne’e, liliu ida Grandes Projetus, ne’ebé la-iha extensaun ba kontratu, ne’e duni hau husu ba kompaña tolu ne’e,servisu ho seriedade,responsabilidade tanba povu presiza dezevolvimentu,atu hadi’a povu nia moris.” Hatutan Ministru MPIE S.E Eng. Gastão Fransisco de Sousa iha nia Diskursu.

Atu hakotu nia intervensaun, Ministru MPIE ne’e kontinua fo atensaun ba kompaña ne’ebé maka responsabiliza ba rehabilitasaun atu la’o tuir kalendariu ne’ebé maka iha ona bazeia ba kontratu ne’ebé maka asina ona, no husu mós ba autoridade lokál,Autoridade Munisipál,Autoridade Postu Administrativu,Autoridade Sivil, Autoridade Militar sira no liliu Komunidade sira ne’ebé maka hela besik kedas iha área konstrusaun Estrada nian hodi tau matan no fo azuda sa-ida maka kompaña sira presiza para bele halo hotu Estrada ne’e tuir tempu ne’ebé maka determina tiha ona iha kontratu laran, Ministru ne’e argumenta mós katak, buat hotu kontratu maka kesi nune’e tengki la’o tuir kontratu ne’e.

Entertantu, Prezidente Autoridade Munisipiu Baucau Sra. Veneranda E. M. Lemos Martins hato’o agradese ba IX Governu ba obra sira ne’ebé maka uluk maun boot Kay Rala Xanana Gusmão nia tempu hamutuk ho Ministru Gastão halo tiha, trasa tiha,maibé la-iha kontinuadade.

“Agradese ba IX Governu,ba obras sira ne’ebé maka uluk Maun boot Kay Rala Xanana Gusmão nia tempu hamutuk ho Señor Ministru Gastão halo tihaaaa, trasa tiha, maibé la-iha kontinuadade,agora ita agradese tanba fila fali mai,hodi bele kontinua fali Estrada sira ne’e.” Hateten PAM Baucau Sra. Veneranda E. M. Lemos Martins.

PAM Baucau hatutan mós katak, Baucau kontente tanba, buat sira ne’ebé maka Governu ne’e promote atu halo,nia mai halo, no PAM ne’e husu nafatin ba komunidade atu bele kolabora.

ita Baucau kontenti,tanba buat sira maka Governu ne’e promote atu halo, nia mai halo, ne’ebé tinan ida ne’e, ita halo lansamentu ba Estrada atu ita bele la’o ho di’ak, husu ba komunidade,atu bele kolabora,se Estrada ne’e maka kona karik ita nia ai-hun ida,ita dehan ko’a ba, atu Estrada bele la’o, la-bele mai hatete fila fali dehan ne’e tengki selu, la selu Estrada la-la’o,tanba de’it ai-hun ida,ita terus narúk ne’e la-bele, kontribui,komunidade sira tengki kontribui,ba sa-ida maka programa Nasionál lori mai ita nia rain." Hatutan PAM Baucau Sra. Veneranda E. M. Lemos Martins.

Prezidente Autoridade Munisipiu ne’e apela mós ba iha kompaña ne’e responsabiliza ba iha rehabilitasaun Estrada ne’e atu la-bele falla, buat ruma iha kraik maka halo falla no intrompe servisu kompaña nian maka komunika lalais ba iha autoridade lokál sira no autoridade munisipál, ho ida ne’e de’it mak bele la’o ho di’’ak.

Estrada ne’ebé maka lansa dau-daun no atu halo rehabilitasaun ne’e fahe ba pakote tolu mak hanesan Pakote III ho naran projetu rehabilitasaun A01JCT.Triloca-JCT A06, Fatumaca-Loilubu-JCT A06 Venilale Road STA 12+075-18+100 (6.025Km) ne’ebé maka sei responsabiliza husi kompaña Jolitoni Unipessoál Lda ba durasaun tinan ida. Projetu Pakote IV ne’ebé maka ho naran projetu rehabilitasaun Estrada A01.JCT.Triloca-JCT A06, Fatumaca-Loilubu-JCT A06 Venilale Road, STA 18+0125-24+150 (6.025Km) sei responsabiliza husi kompaña  Glory Enterprise ho durasaun tinan ida no Projetu Pakote V ho naran projetu rehabilitasaun A01.JCT.Triloca-JCT A06, Fatumaca-Loilubu-JCT A06 Venilale Road, STA 24+150-30+190 (6.040Km) sei responsabiliza husi kontraktór Golden Way ba durasaun tinan ida.  Projetu Pakote tolu ne’e, MPIE maka núdar na’in ba Projetu no orsamentu mai husi Fundu Infraestrutura.

Partisipa iha Serimonia Lansamentu hatúr Fatúk da-uluk ne’e maka Ministru MPIE ho nia Komitiva, Diretór Ezekutivu ADN ho nia Komitiva, Diretór Ezekutivu SGP ho nia Komitiva, Diretór Ezekutivu CNA ho nia komitixa, Prezidente Autoridade Munisipiu Baucau no nia Komitiva, Komandante Polisia Munisipiu Baucau, Komandante Terestres F-FDTL Munisipiu Baucau, Xefi Suku sira, Reliziozus no Relizozas sira, Diretór Obras Públika Munisipiu Baucau, Assesór Tékniku ADN no Tékniku ADN sira, Estudantes no Komunidade sira. (Media_ADN)


LEMA ADN

  • Aprende hodi halo, halo hodi aprende;
  • Haburas kreatividade no inovativo de servisu;
  • Hametin principiu servisu salva an, salva superior/liders, salva instituisaun no salva nasaun;