info@adn.gov.tl
+670 3310289

Lansamentu Projetu Rehabilitasaun Estrada Caravela-Caisido-Aeroportu Baucau

  • Publika husi: Maximiano
  • Loron: 11/Jan/2025


Baucau,11/01/2025. Ministru Planeamentu Invesimentu no Estratéjiku (MPIE) S.E Eng. Gastão Fransisco de Sousa, akompaña husi Diretór Ezekutivu ADN Sr. Rui Lourenço da Costa no mós Adjuntu Diretór Ezekutivu ADN Eng. Januario M. Guterres no Assesór Tékniku sira husi ADN inklui mós Tékniku sira balu husi ADN halo lansamentu hatúr fatúk da-uluk ba Projetu rehabilitasaun Estrada JCT. A01 Caravela-Caicido-Aeroportu Baucau STA 10+500-STA 18+740. Lansamentu ne’e rasik realiza iha Suku Tirilolo, Aldeia Caisido, Postu Administrativu Baucau,Munisipiu Baucau Vila.

Ministru MPIE S.E Gastão Fransisco de Sousa iha nia diskursu hateten katak obra ida ne’e importante ba ita hotu, ba ita nia povu no mós ita nia rain.

“ Atu ko’alia dehan, obra ida ne’e uluk hau maka asina kontratu, altura sei Ministru, tanba obra sira ne’e hau tengki ba Tribunál, la-iha buat ida,hau sei infrenta nafatin, maibé importante benefisiu ba ita, ba ita nia Povu, ba ita nia rain,ida ne’e deit, tanba ne’e maka obra ne’e, hau mai fila fali ona, hanesan Ministru MPIE, ita tengki ba oin mós ita espera katak obra ida sorin Ostiko ba to’o Venilale ne’e mós sei ba oin.” Hateten Ministru MPIE S.E Gastão Fransisco de Sousa iha nia Intervensaun.

Ministru MPIE ne’e husu atu kompaña ne’ebé maka implementa projetu rehabilitasaun ne’e atu servisu ho di'ak no halo obra ne’e ho kualidade no husu mós ba autoridade lokais sira atu mós tau matan ba obra sira ne’e.

“ Ba Emprezariu sira, halo didiak ba ho kualidade hanesan ida kraik sa’e mai, ohin hau liu hau kontenti, haree obra ne’e sei di’ak, maibé limpeza mós tengki halo, ohin hau haree du’ut tama ona ba Estrada laran, autoridade Lokais sira haree ba konserva ita nia rikusoin, ne’eba halo ho ita nia osan, osan be Timor ninian ba ita, ita maka tengki konserva buat sira ne’e para diak nafatin para ita bele utiliza ba oin, ne’ebé autoridade lokál sira, esforsa tau liman hamutuk ba para obra ne’e mantein di’ak to’o tempu halo manutensaun, ita sei halo manutesaun maibe se ita bele, tau nia vida naruk liu tan diak liu tan ba ita, osan manutensaun ne’e ita halo fali ba buat seluk. Hateten Ministru MPIE S.E Gastão Fransisco de Sousa iha nia Diskursu.

Iha nia intervensaun ne’e, Ministru MPIE husu mós ba inan aman sira hodi tau matan mós ba Estrada se karik maka kompaña halo la lós bele fo hatene ba autoridade sira.

“Hau husu mak hau nia inan aman sira,tau matan ba Estrada ba, se halo la tuir lóos, fo hatene ba autoridade sira dehan katak kompaña ne’e halo la loos,hatudu provas para ita mós bele fo hanoin ba kompaña para bele halo tuir dezeñu no BoQ ne’ebé iha.” Hateten Ministru MPIE iha nia Diskursu.

Iha oportunidade hanesan, Prezidente Autoridade Munisipiu Baucau Sra. Veneranda E. M. Lemos Martins iha nia diskursu, agradese Ministru MPE no mós nia komitiva ne’ebé maka hakat to’o ona mai Baucau.

“ Señor Ministru, muito bemvindo, ho komitiva tomak, mai Baucau,ami kontenti teb-tebes,bain hira Señor Ministru sama ain iha Baucau,ita dehan buat hotu sei la’o, em termus de infraestrutura.” Hateten PAM BAUCAU Sra. Veneranda E. M. Lemos Martins.

Ema númeru primeiru iha Munisipiu Baucau ne’e kontinua husu atu Ministru MPIE mai bei-beik Baucau, nune’e infraestruturas bele la’o barak liu tan, iha tinan 2025.

“Bainhira Señor Ministru sama ain iha Baucau, ita dehan buat hotu sei la’o,  em termus de Infraestrutura, tanba ne’e ita husu atu Señor Ministru mai bei-beik Baucau,nune’e infraestruturas bele la’o barak liu tan di’ak liu tan iha tinan 2025, hau nia hakruk no hadomi ba señor Ministru,ho komitiva tomak, Diretór Ezekutivu ADN, Diretór Ezekutivu Grandes Projetus.’’ Hato’o husi PAM Baucau Sra. Veneranda E. M. Lemos Martins

PAM Baucau iha biban ne’e hateten mós katak Estrada ne’e mak importante teb-tebes ba komunidade sira ne’ebé maka hela iha área ida ne’e,no suku lubuk ida ne’ebé mak liu husi Estrada ne’e sei hetan mós benefisiu.

“Ba komunidade tomak, ne’ebé maka iha Suku rua, ne’ebé sei sai benefisiariu, la’os deit Tirilolo,la’os de’it Caisido, la’os de’it Caibada, maibé Suku lubuk ida, ne’ebé maka sei liu husi Estrada ida ne’e,sei hetan mós benefisiu, Estrada ne’e mak importante tebes ba ita hanesan komunidade sira ne’ebé hela iha ne’e.” Hateten PAM Baucau Sra. Veneranda E. M. Lemos Martins iha nia Diskursu.

PAM Baucau ne’e husu atu hotu-hotu akompaña halo didiak, kontribui, hanesan komunidade kontribui maka’as liu tan tanba infraestruturas ka dezenvolvimentu ne’ebé planeadu, tengki kontribui atu servisu sira ne’e la-bele para iha dalan klaran.

“ Ita akompaña halo didiak,ita kontribui,hanesan komunidade ita tengki kontribui maka’as liu tan tanba infraestruturas ka dezenvolvimentu ne’ebé planeadu mai ita tengki kontribui atu servisu sira ne’e la-bele para iha dalan klaran,se ita hakarak dezenvolvimentu ba oin." Hatutan husi PAM Baucau Sra. Veneranda E. M. Lemos Martins.

Atu hakotu nia intervensaun, PAM Baucau Sra. Veneranda E. M. Lemos Martins hasai moto ne’ebé maka daudaun ne’e komunidade munisipiu Baucau sira hahu Pratika maka Baucau,ami prontu atu simu kualker dezenvolvimentu,no Baucau oan baruk atu moris iha susar nia laran.

Partisipa iha serimonia Lansamentu hatúr Fatúk da-uluk ba projetu rehabilitasaun Estrada ne’e maka; Ministru MPIE S.E Gastão Fransisco de Sousa ho nia komitiva, Prezidente Autoridade Munisipiu Baucau ho nia komitiva, Komandante Polisia Munisipiu Baucau, Komandante F-FDTL komponente Terestre munisipiu Baucau, Relijiozus sira, Autoridade lokál sira husi Postu Administrativu Baucau,komunidade sira no mós komvidadus sira. (Media_ADN)

 

 

 

 

LEMA ADN

  • Aprende hodi halo, halo hodi aprende;
  • Haburas kreatividade no inovativo de servisu;
  • Hametin principiu servisu salva an, salva superior/liders, salva instituisaun no salva nasaun;