Manatuto, 12/12/2024. Diretór Ezekutivu ADN Rui Lourenço da Costa hamutuk ho Adjuntu Diretór Ezekutivu ADN Eng. Januario M. Guterres, Koordenadóra UGA Sra. Amelia da Costa, Koordenadór UAP Arq. Jose Fernando Liu, Koordenadór UCVQ Sr. Francisco Xavier de Deus Jerónimo, Xefi Aprovizionamentu ADN Sra. Ernania de Jesus Sarmento, Xefi Departamentu Edifisiu Públiku Sr. Egídio Gonçalves, Assesór Tékniku ADN Sr. Diogo Pereira no mós Asesór Tékniku ADN Fransisco dos Reis Hornai partisipa iha serimonia hatúr fatuk da-uluk ba konstrusaun Rezidénsia no Estrada Saututun ne’ebé maka lokaliza iha Postu Administrativu Manatuto Vila, Munisipiu Manatuto.

Ministru MPIE Eng. Gastão Fransisco de Sousa iha nia intervensaun husu atu tau matan nafatin ba rehabilitasaun ida ne’e, tuir Ministru MPIE katak fatin ne’e rehabilita hanesan mós propriedade estadu nian ne’ebé maka sei utiliza husi nain ulun sira.

“obra maka ne’e ona, hau espera katak Prezidente Autoridade tau matan nafatin ba rehabilitasaun ida ne’e, tanba ida ne’e ita rehablita hanesan mós propriedade estadu nian ne’ebé sei utiliza ba ita nia nai ulun sira, ne’eé maka sei mai atu hela iha ne’e. “Hateten Ministru MPIE Eng. Gastão Fransisco de Sousa iha nia Intervensaun.

Ministru MPIE hatutan mós katak, kuandu projetu Greater Sunrise, mak fatin ida ne’e sei sai núdar rezidénsia ida ba Primeiru Ministru hodi hela ba atu nune’e halo servisu relasiona ho Greater Sunrise

“liliu ita nia maun boot, bainhira Greater Sunrise ne’e hahu, nia fatin, mai hela iha ne’e servisu Greater Sunrise nian. Hatutan Ministru MPIE Eng. Gastão Fransisco de Sousa iha nia Intervensaun.

Ministru MPIE husu mós ba kompaña ne’e responsabiliza ba rehabilizasaun atu halo rehabilitasaun ho didiak, tanba laos deit núdar patrimonia estadu nian maibé ba oin kuandu greater Sunrise implementa ona maka Primeiru Ministru sei hela iha fatin ne’e maka sei halo servisu sira ne’ebé maka relasiona ho asuntu Greater Sunrise, Ministru kontinua husu atu kompaña halo servisu ne’e ho di’ak bazeia ba dezeñu ne’ebé maka verefika ona husi ADN.

Iha oportunidade hanesan, Ministru Administrasaun ESTATAL (MAE) Sr. Tomás do Rosário Cabral, iha nia intervensaun hateten rezidensia ne’e sei sai ofisiál,no sei sai palasiu ida iha munisipiu Manatuto no depois de Inagurasaun MAE mak sei jere provizoriu.

“Ba ADN no Ministru, hau hanoin rezidensia ne’e sei ofisiál, nia sei sai palasiu ida iha munisipiu ne’e, depois de inagurasaun ami maka sei Jere provizoriu antes intrega ba Autoridade Munisipál sira.” Hateten Ministru MAE Sr. Tomás do Rosário Cabral, iha nia intervensaun.

Ministru MAE husu atu uma ida ne’e rehabilita no mantein nafatin ninia orizinalidade, la bele muda buat seluk.

“hau hanoin ba Señor Prezidente Autoridade, Señor Sekretariu sira, Señor Ministru iha ne’e, ADN iha ne’e, kontraktór ne’ebé atu halo konstruksaun, ita mantein uma ne’e nia orizén, ita la-bele muda buat seluk, mais hau husu ba admnistrasaun munisipál liliu Obras Públiku,ho Sekretariu Munisipál ida ba Planeamentu ne’e, la-bele husik fatin ne’e mamuk, la-bele hein deit sira ADN mai husi Dili, ita boot sira mós iha ne’e bele mai, ita boot sira hanesan dono de Propriedade, se ita hakarak buat ida atu di’ak, buat ida ne’e ita nian duni, ita nain rasik mak tengki mai lorloron”. Hateten Ministru MAE iha nia Intervensaun.

Entertantu, Prezidente Autoridade Munisipiu Manatuto Sr. Luís Inacio Henriques Fernandes, iha nia intervensaun, hateten katak, lansamentu Projetu MPIE iha Munisipiu Manatuto laos Primeira Vez, Projetu finansia husi Fundu Infrastrutura projetu lubuk boot ida.

“ lansamentu projetu MPIE iha Munisipiu Manatuto ba tinan ne’e laos Primera Véz, Projetu finansia husi Fundu Infrastrutura projetu lubuk boot ida, felismente lansamentu lansamentu ida ne’e Ministru MPIE ho Ministru Administrasaun ESTATAL mai rasik”. Hateten Prezidente Autoridade Munisipiu Manatuto Sr. Luís Inacio Henriques Fernandes iha nia Intervensaun.

Rezidensia Saututu Manatuto ida ne’e, nia konstrusaun hari iha tempu portugés nian, hafoin ne’e abandona tiha iha tinan barak nia laran, ho nune’e Governu Konstitusionál da-IX ne’e liu husi Ministru MPIE no Ministru MAE iha inisiativa hodi halo hikas rehabilitasaun no ba futuru sei utiliza núdar rezidensia ofisiál no mós palasiu ida iha munisipiu Manatuto. (Media_ADN)