Manatuto, 06/12/2024. Diretór Ezekutivu ADN Sr. Rui Lourenço da Costa, akompaña husi Adjuntu Diretór Ezekutivu ADN Eng. Januario M. Guterres, Koordenadóra UGA Sra. Amelia da Costa, Koordenadór UAP Arq. Jose Fernando Liu, Xefi Departamentu Aprovizionamentu ADN Sra.  Ernania de Jesus, Assesor Tékniku ADN Sr. Diogo Pereira, Asesór Tékniku ADN Eng. Gui Daniel Tavares,  Asesór Tékniku ADN Fransisco dos Reis Hornai inklui ofisiais Finansas ADN no mós tékniku ADN destakadu iha munisipiu Manatuto, partisipa iha serimonia lansamentu Rehabilitasaun ba Uma Antigu ne’ebé lokaliza iha Saututu Manatuto.

Iha nia diskursu D.E ADN Sr. Rui Lourenço hateten katak uma antigu ida ne’e, ho realizasaun ohin (Lansamentu rehabilitasaun) ba futuru sei utiliza núdar rezidensia no sei okupa husi Primeiru Ministru S.E Kay Rala Xanana Gusmão mak sei hela ba.

“uma ida ne’e, ho realizasaun ohin katak uma ida ne’e, ba futuru Primeiru Ministru, ita nia maun boot Kay Rala Xanana Gusmão mak sei mai okupa, sei hela iha ne’e, mabé nia (refere ba Uma) sei sai hanesan Palasiu ida iha ne’e, atu halo sa-ida, aleiñde mai hakbesik,akompaña lideransa lokál, autoridade sira ninia ukun, ninia atensaun, ninia knar sira,nia mós fo atensaun espesiál ida ba kadoras atu dada mai Timor Leste.” Hateten D.E ADN durante diskursu.

Lideransa masimu ADN ne’e hatutan mós katak, ho uma ida ne’e, fo hatudu tan pasu ida,besik liu tan ba ita atu konkretiza kadoras dada mai Timor Leste, tuir komprimisu Governu Konstitusional da-9 nian.

Atu hakotu nia intervensaun, Diretór Ezekutivu ADN iha oportunidade ne’e, hato’o mós nia agradesimentu ba iha inisiativa di’ak husi Ministru Administrasaun ESTATAL (MAE) Sr. Tomás Cabral no mós Ministru Planeamentu Investimentu no Etratejiku (MPIE) Eng. Gastão Fransisco de Sousa ne’ebé maka fo ona hanoin di’ak hodi rehabilita uma antiga Saututu ida ne’e.

Diretór ne’e mós enkoraja atu kompaña ne’ebé responsaviliza ba rehabilitasaun atu ezekuta obra ne’e ho di’ak tanba fatin ne’e sei sai núdar Palasiu, Governu ka nain ulun sira nian, Estadu Timor Leste nian, ne’ebé maka reseisaun Prezidente Repúblika, Bainaka husi Nasaun seluk ne’ebé hakarak atu halo vizjén no reseisaun halo iha Manatuto, iha ona espasu ida ne’e di’ak hodi simu bainaka sira.

Iha serimonia lansamentu ida ne’e, aleinde haraik bensa husi Padre Parokia Manatutu nian ba Uma ne’e, iha oportunidade hanesan realiza mós serimonia kulturál hodi husu matak malirin ba bei-ala sira, atu nune’e atividade tomak ne’ebé hala’o iha Saututu no mós ba future mai bele la’o ho di’ak deit.

Aleinde D.E ADN ho nia Ekipa, Marka mós prezensa iha serimonia lansamentu ne’e, Prezidente Autoridade Munisipiu Manatuto Interina Sra. Domingas Gilpa, Reprezentante Postu Administrativu Manatuto Vila, Xefi Suku Sau, Xefi Suku Aiteas, Padre Parokia Manatuto, Diretór Obras Públiku Manatuto, Tékniku ADN destakadu iha Munisipiu Manatuto no komvidadus sira seluk. (Media_ADN)