Dili,15/11/2024. Adjuntu Diretór Ezekutivu ADN Eng. Januario M. Guterres, akompaña husi ekipa tékniku, iha loron hirak liu ba, halo vizita traballu ba iha Konventu Madre Santa Clara Santisimu Sakramentu ne’ebé maka lokaliza iha Tunubibi, Postu Administrativu Maliana, Munisipiu Bobonaro.

Objetivu husi vizita traballu ida ne’e maka atu hare haree direita kondisaun inklui halo komunikasaun direita ho Madre sira hodi rona kona-ba sira nia preokupasaun ba situasaun sira ne’ebé maka sira hasoru liliu iha areadóres Konventu.

Madre sira haktuir sira nia preokupasaun kona-ba difikuldade hodi asesu dalan ba sira nia konventu wainhira tempu udan, tantu ho motorizadas no la’o ain hodi nune’e sira nia atividade integradas sira hanesan atividade relijioza no mós atividade sosiais sira seluk hanesan hanorin labarik sira no atividade komunitaria la bele la’o ho di’ak.

Haree ba difikuldade ne’ebé maka sira infrenta, ho nune’e Madre sira husu apoiu ba Governu liu husi ADN no mós instituisaun relevante sira atu nune’e bele konstrui no rehabilita Estrada liga ba iha sira nia konventu.

Hafoin rona tiha preokupasaun husi Madre sira, Adjuntu Diretór Ezekutivu hamutuk ho ekipa tun direta ba tereñu hodi halo observasaun ba kondisaun atúal Estrada refere no nota katak, kondisaun Estrada refere nesesariu hodi halo rehabilitasaun tanba kondisaun Estrada ne’ebé maka at, kuák, degradasaun ka deklinu ba rai inklui valeta ka drainazén ne’ebé mak estragadu. Estrada ne’e la’os deit fasilita madre sira maibé mós ba Komunidade sira ne’ebé maka hela besik iha área refere.

Haree tiha kondisaun Estrada no mós drainazén ho nune’e iha tempu besik ADN através Unidade Avaliasaun Projetu adisionalmente sei halo levantamentu tékniku ne’ebé maka detallu no apropriadu ba Estrada refere. (Media_ADN)