Dili, 15/11/2024. Ajénsia Dezenvolvimentu Nasionál hamutuk ho Sekretariu Estadu Igualdade (SEI) Timor-Leste no mós Associação Empresarial das Mulheres de Timor-Leste (AEMTL) realiza seminariu nasionál Feto Emprezariál ne’ebé maka hala’o iha Salaun Timor Lodge, Comoro.

Tema ba Seminariu Nasionál ida ne’e maka Perfil Feto Emprezariál ho Kbit Atu Sai Protagonista ba Dezenvolvimentu Nasionál, Liu-liu iha Infraestrutura. Entertantu Seminariu Nasionál ida ne’e direitamente loke husi Ministru MPIE Eng. Gastão Fransisco de Sousa.

Ministru MPIE iha nia diskursu abertura ba seminariu ida ne’e, husu atu partisipante sira hotu bele partisipa,diskute oinsa rekomendasoens balu mai Governu bele toma konsiderasaun para  bele la’o ba oin.

“ hau husu, ita boot sira nian partisipasaun iha seminariu ida ne’e, partisipa,diskute, rekomendasaun balu mai, governu bele toma konsiderasaun, ita la’o ba oin, konserteza liliu mak ne’e, orienta feto maluk sira iha nivél, iha faze, emprezaria nian,ita koalia kona-ba vida emprezariál, lori feto maluk sira para bele hanesan ho ita nian mane maluk sira, ida ne’e mak ita nia objetivu." Hateten husi S.E Ministru MPIE iha nia diskursu.

Atu hakotu nia intervensaun, S.E Ministru MPIE Eng. Gastão Fransisco de Sousa kongratula mós ba iha ADN, AEMTL no mós SEI ne’ebé maka organiza ona seminariu ida ne’e, no Ministru kontinua husu atu partisipantes emprezariál Feto sira atu mai tur hamutuk, rona, ko’alia ba malu sa-ida mak presiza. Ministru mós dezeja atu iha futuru empreza feto sira bele sai boot hanesan emprezariu mane sira iha Timor laran.

Diretór Ezekutivu ADN Sr. Rui Lourenço da Costa haktuir katak ho Seminariu Nasionál ida ne’e, ADN bele fo apoiu ba grupu emprezariál feto sira ne’ebé maka presiza teb-tebes fo apoiu liu tan ba sira.

“ ho seminar ida ne’e, ami mós bele fo apoiu espesifiku ba ita nia grupu emprezariál feto sira, ne’ebé maka ita presiza teb-tebes apoiu liu tan ba sira, atu nune’e, hanesan ohin dehan laos atu kompete numeru deit maibé atu sai parseiru lolos ne’ebé maka tuir topiku ne’ebé hatete katak tenki sai protagonista ba dezenvolvimentu nasionál liliu iha atividade konkretu mak infraestruturas, ida ne’e maka ami nia hanoin”. Hateten D.E. ADN Sr. Rui Lourenço da Costa

Diretór Ezekutivu ne’e hatutan mós katak seminariu ida ne’e núdar primeiru pasu no tengki koopera hamutuk, tengki estabelese vizaun ida deit,oinsa maka bele fo oportunidade ba kompaña emprezaria feto sira atu bele partisipa no mós hasa’e sira nian esperensias, konesimentu,kapasidade téknika sira. Superior ADN ne’e relata móskatak Faze tuir mai mak tenki iha diskusaun klean entre tékniku ADN ho AEMTL no SEI liu-liu halo formasaun konkreta, sistematika, estruturadu kona-ba jestaun projetu, kona-ba maka oinsa halo elaborasaun BoQ sira, tanba asuntu sira ne’e importante tebes para depois empreza sira ne’ebé maka ligadu ho lideransa feto sira nian bele efektivamete mós bele partisipa iha prosesu konstrusaun Nasaun.

Enkuantu partisipa iha seminariu ne’e maka hanesan, S.E Ministru MPIE Eng. Gastão Fransisco de Sousa no mós Assesor sira husi MPIE, D.E ADN Sr. Rui Lourenço da Costa, Adjuntu Diretór ADN Eng. Januario M. Guterres, Kargu Xefia sira husi ADN, Assesór Tékniku sira husi ADN, Diretór no Xefi Departamentu husi SEI, Diretór Ezekutivu FDCH no mós Adjuntu Diretór FDCH, Prezidente AEMTL no nia ekipa inklui emprezaria sira. (Media_ADN)