RAEOA, 26/12/2024. Hafoin simu tiha orientasaun husi  S.E Primeiru Ministru RDTL Sr. Kay Rala Xanana Gusmão, hodi orienta tékniku sira hodi fo apoiu ba Diresaun no Departamentu sira atu bele halo servisu ho di’ak nune’e através Ministru MPIE Eng. Gastão Fransisco de Sousa orienta ADN hodi halo vizita da-uluk ba RAEOA iha loron 06 Marsu tinan 2024 liu ba hodi realiza enkontru ho Prezidente RAEOA-ZEESM no mós nia estrutura, vizita ida iha momentu ne’eba ho objetivu prinsipál atu koordena ho Sekretáriu rejionais sira hodi rona rasik entidade hirak ne’e nia pensamentu.

ADN núdar Instituisaun Públiku ida ne’ebé maka Estadu harii ho Knar atu tau matan ba implementasaun, Planu no mós implementasaun projeitus sira hotu, liga ho ida ne’e prezensa ADN iha RAEOA importante tebes,atu fo apoiu ba parte sira hotu ne’ebé maka servisu iha área infraestruturas inklusivamente kompaña sira hotu-hotu atu sira bele hala’o knar ho lolos, halo didiak, no ho prinsipiu ida katak atu fo valór ba osan povu nian, públiku nian ne’ebé maka gasta ba investimentu iha infraestruturas,no mós liu husi servisu ne’ebé maka atu garante transparensia ho responsabilidade ho lolos, tantu husi tékniku sira husi ADN nian, no mós husi Obras Públikas,liuliu sira ne’ebé servisu iha tereñu halo implementasaun ba projeitu ho nune’e maka ADN hahu estabelese nia edifisiu no mós rezidensia ofisiál iha RAEOA.

Tinan barak nia laran ADN la marka prezensa iha RAEOA no ho politika IX Governu Konstitusionál nian ne’ebé maka lideradu husi Primeiru Ministru S.E Kay Rala Xanana Gusmão nian no mós ho lideransa husi Prezidénti Autoridade RAEOA nian S.E. Rogerio Tiago Lobato nian, ne’ebé maka ho laran haksolok husu bebeik ADN atu fila hikas ba RAEOA ho nune’e maka Prezidénte RAEOA fo fatin ba ADN hodi instala hikas nia edifisiu iha RAEOA.

Edifisiu no rezidensia ofisiál ADN nian ne’e rasik hahu konstrui iha fulan Juñu liu ba ne’ebé maka responsabiliza husi kompaña Raynaldo’s Unipessoál Lda. Konstrusaun ida ne’e rasik han tempu durante fulan 6 no kompaña intrega ba ADN iha loron 26/11/2024 foin lalais.

Ministru MPIE S.E Eng. Gastão Fransisco de Sousa iha nia diskursu durante serimonia inagurasaun ba Edifisiu no Rezidensia Ofisiál ADN nian ne’e hato’o katak Osan Povu nian tenki jere ho di’ak, Ministru ne’e salienta katak ho liafuan ne’e maka ADN mosu.

“Hau, liafuan ikus ne’ebé Ministru nian, dehan Osan Povu nian,tengki Jere ho di’ak,komu liafuan ne’e maka ADN mosu, oinsa ita bele implementa projetus ho di’ak,ho responsabilidade, ho transparensia, para osan ne’e utiliza lolos, tuir projetu ne’ebé, para bele garante kualidade projetu nian, no benefisiu ba ita hotu, ba povu tomak, ba Nasaun ida ne’e”. Hateten Ministru MPIE S.E Eng. Gastão Fransisco de Sousa iha nia diskursu.

Ministru MPIE ne’e hatutan mós katak, ADN nia prezensa iha RAEOA, para atu kompleta servisu iha RAEOA, la-bele iha kompetisaun entre ADN ho Obras Públikas, Infraestruturas RAEOA ninian, maibé azuda malu rezolve problema hodi nune’e bele garante kualidade obras sira ne’ebé maka iha.

“ agora, relasaun ho ADN mai RAEOA, hau husu ba ADN sira, mai para atu kompleta servisu RAEOA nian, la-bele iha kompetisaun, entre ADN ho Obras Públikas, Infraestruturas RAEOA ninia, mai azuda malun, rezolve problema, para bele garante kualidade obras sira ne’ebé implementa iha ne’e (RAEOA- Red), ita nia Ego ne’e soe tiha ba kotuk, ita haree oinsa bele azuda malun, se iha ne’e presiza kapasita tengki azuda, la’os ba funsionarius deit, maibé mós ba emprezarius sira ne’ebé presiza azuda,tengki azuda, ida ne’e maka funsaun ADN nian,hodi la’o ba oin, hodi bele garante kualidade Projetus”. Hatutan Ministru MPIE S.E Eng. Gastão Fransisco de Sousa iha nia diskursu.

Ministru MPIE iha nia diskursu ne’e husu mós ba funsionariu husi ADN ne’ebé maka koloka iha RAEOA, tengki kria koordenasaun di’ak ho Administrasaun RAEOA, la-bele la’o mesak deit.

“hau husu ho haraik  án ba téknikus ADN nian, tau tiha imi nia ego dehan imi maka matenek hotu,imi maka sa-ida, la-bele,ténki azuda malu, para servisu bele la’o di’ak, I la’o ba oin, ida ne’e maka hau hakarak fo hatene ba ita boot sira”. Haktuir husi Ministru MPIE S.E Eng. Gastão Fransisco de Sousa iha nia diskursu.

Agora ADN iha ona nia edifisiu iha RAEOA, nune’e Ministru MPIE hato’o mós nia esperansa katak tinan oin mai sei iha tan edifisiu ne’ebé hanesan iha mós munisipiu sira seluk, tanba bazeia ba relatoriu ne’ebé maka iha hateten katak iha munisipiu balun Edifisiu ADN nian seidauk iha, ho nune’e Ministru MPIE fo orientasaun hodi nune’e prepara BoQ,dezeñu,Osan,lori ba KAFI aprova, para halo, ADN nian tenki halo, tanba ADN maka sei garante obras iha Timor laran tomak.

Atu hakotu nia diskursu durante serimonia inagurasaun edifisiu no Rezidensia Ofiál ADN nian, Ministru MPIE ne’e mós kontinua enkoraza no husu atu servisu nafatin ho di’ak, la’o tuir regulamentu ADN nian,la’o tuir prosidementus ne’ebé iha, lalika rona buat oin-oin, la’o tuir regulamentu maibé ténki iha mós dignidade, responsabilidade, baihira hala’o knar, Ministru MPIE ne’e nafatin husu atu dignidade ténki iha.

Entertantu Prezidente Autoridade RAEOA-ZEESM ne’ebé marka mós prezensa iha serimonia inagurasasaun ba Edifisiu no rezidensia ofisiál ADN nian ne’e hato’o mós nia intervensaun katak, hafoin nia simu tiha knar núdar Prezidente RAEOA, buat ida uluk liu Primeiru Ministru hato’o ba nia maka,sei haruka delegasaun ida husi ADN nian atu ba apoiu Prezidente Autoridade RAEOA, hodi halo avaliasaun, verifikasaun ba projetus Infraestruturas, iha RAEOA.

“ Baihira hau simu Knar núdar Prezidente Autoridade RAEOA nian, buat ida uluk liu,maka Señor Primeiru Ministru dehan ba hau maka ne’e, Rogerio, hau sei haruka delegasaun ADN nian,atu mai apoiu ita boot, atu halo avaliasaun,verifikasaun, ba projetus Infraestrutura iha RAEOA”. Hato’o husi Prezidente Autoridade RAEOA-ZEESM Sr. Rogerio Tiago Lobato iha nia diskursu.

Prezidente Autoridade RAEOA-ZEESM ne’e hatutan katak, hafoin simu tiha orientasaun ne’e, nia parte simu delegasaun mai husi Dili no servisu ho nia parte di’ak teb-tebes, mesmu dala ruma iha difikuldades iha alojamentu iha inisiu, maibé delegasaun ne’e fo nafatin apoiu ba iha RAEOA.

“ liu tiha ida ne’e, delegasaun mai husi Dili, servisu ho ami di’ak teb-tebes, dala ruma ho difikuldades iha alojamentu iha inisiu, maibé sira fo nafatin apoiu ba iha RAEOA, tanba ami presiza duni apoiu husi ADN ninian para atu,deskobre iregularidades balu”. Hateten Prezidente RAEOA iha nia Intervensaun.

Iha nia intervensaun durante serimonia inagurasaun ba edifisiu no rezidensia ofisiál ADN nian ne’e prezidente Autoridade RAEOA-ZEEMS espresa mós nia kontenti ba prezensa ADN nian ne’e.

“ Exelensia Ministru,hau kontenti teb-tebes ho prezensa ADN ninian iha ne’e, ADN parseiru RAEOA ninian, atu halo verifikasaun, avaliasaun ba projetu sira, iha área nebé-nebe deit, para buat hotu ne’ebé kuandu ita gasta, osan estadu nian, tengki gasta ho di’ak, I ho transparensia”. Hateten Prezidente RAEOA durante hala’o nia diskursu iha serimonia inagurasaun ne’e.

Prezidente Autoridade RAEOA-ZEESM kontinua agradese no hato’o katak nia parte simu ADN ho fuan boot, laran luak, nia hatutan mós katak ho haraik án rekoñèse katak sira nia parte la hatene buat hotu, no tengki aprende buat barak husi ADN, nia hatete mós katak, ADN mai atu kompleta servisu iha RAEOA no la’os atu konkore ka halo konkorensia ho DRI, Prezidente Autoridade ne’e mós kontinua hato’o agradese ba Ministru MPIE ne’ebé maka haruka ona ADN hodi mai iha RAEOA, no nia espera katak agora ADN bele hela permanenti ona.

Iha Oportunidade hanesan, Vice Primeiru Ministru I, Ministru Asuntu Ekonomia no Ministru Turismu no Ambiente Sr. Francisco Kalbuadi Lay, ne’ebé iha oportunidade ne’e marka mós prezensia iha atividade ne’e, liu husi nia diskursu parabéniza mós Ministru MPIE,Diretór Ezekutivu ADN Nia lideransa hodi nune’e bele iha fasilidade foun ida ba ADN bele servisu ho di’ak liu tan.

“uluk nanain, hau hato’o parabens ba ita boot no Ministru nia lideransa, ne’ebé mak ita hotu-hotu iha fasilidade foun ida ba ADN bele servisu ho di’ak liu tan, lori Primeiru Ministru nia naran no mós hanesan Ministru Koordenadór ba Assuntu Ekonomiku nian, hato’o parabens dala ida tan ba ekipa tomak”. Hateten  husi Vice Primeiru Ministru I, Ministru Asuntu Ekonomia no Ministru Turismu no Ambiente Sr. Francisco Kalbuadi Lay.

Entertantu Diretór Ezekutivu ADN Sr. Rui Lourenço da Costa iha nia diskursu hateten katak iha momentu simples ne’e, haksolok simu komvidadus sira hotu, no agradese mós ba iha Xefi Suku ne’ebé maka fo apoiu tomak ba prosesu ida ne’e.

“ho apoiu Xefi Suku nian, maka ohin bele realiza atividade, ka bele mós kompaña bele finaliza atividade ida ne’e ho di’ak, mais liliu hakarak agradese mós ba Maromak tanba nia apoiu tomak maka ita bele hala’o servisu ida ne’e, agradese mós ba Sua Exelensia Ministru tanba ho apoiu tomak nune’e bele aprova orsamentu ida ho urjenti atu nune’e ita bele konklui ita nia atividade ida ne’e, agradese mós ba Prezidente RAEOA tanba ho apoiu maka bele konsere ka providensia rai ida ne’e atu nune’e ADN bele mai konstrui uma ida ne’e, ne’e duni ba ita boot hotu-hotu nia apoiu hau hakarak hato’’o agradese wain”. hatete D.E ADN Sr. Rui Lourenço iha nia Diskursu iha Serimonia Inagurasaun Edifisiu no Rezidensia Ofisiál ADN nian iha RAEOA.

Diretór Ezekutivu ADN iha nia intervensaun ne’e fo mós parabens ba kompaña no tekniku sira hotu-hotu ADN nian ne’ebé maka bele konklui tiha ona, fo apoiu tomak ba malu para bele konklui konstrusaun ba edifisiu no rezidensia ofisiál ADN nian ida ne’e. Antes hakotu nia intervensaun Diretór Ezekutivu ADN ne’e hato’o mós katak konseitus ne’ebé maka hahu ho estabelisimentu rezidensia no eskritoriu ADN ninian ne’e aliña ho politika Governu ida ne’e ninian, atu oinsa maka bele garante transparansai no ezekusaun lolos ho di’ak iha prosesu konstrusaun Estadu liu-liu iha Jestaun implementasaun ba projetu sira nian.

Partisipa iha Serimonia Inagurasaun ba Edifisiu no Rezidensia Ofisiál ADN nian ne’e maka Vice Primeiru Ministru I, Ministru Asuntu Ekonomia no Ministru Turismu no Ambiente Sr. Francisco Kalbuadi Lay, Ministru MPIE S.E Eng. Gastão Fransisco de Sousa, Prezidente Autoridade RAEOA-ZEESM Sr.Rogerio Tiago Lobato, Diretór Ezekutivu ADN Sr. Rui Lourenço da Costa, Adjuntu Diretór Ezekutivu ADN Eng. Januario M. Guterres, Koordenadór no Koordenadora sira husi ADN, Kargu Xefia sira husi ADN, Assesor no Asseora Prinsipál no Tékniku husi MPIE no ADN, Kargu Diretór Jerál no Diretúr sira husi MPIE, Adjuntu Diretór Ezekutivu ST-FDCH no nia Ekipa, Adjuntu CNA no nia ekipa, membru Deputadu balu, Padre Parokia Julio Carmo, Xefi Suku, Diretúr DRI RAEOA no mós funsionariu balu husi ADN. (media_ADN)