Dili, 03/09/2024. Hafoin termina tiha konstrusaun ba Altar, rehabilitasaun ba Katerdál Dili, rehabilitasaun ba iha komventu Madre ALMA sira nian. Governu Timor Leste kontinua prepara hela fatin provizoriu ba Peregrinus sira ne’ebé maka sei mai husi munisipiu sira inklui husi RAEOA no mós husi NTT ne’ebé maka rezistradu ona iha idak-idak nia Diocese no Parokia.

Hela fatin ba peregrizus sira ne’e Governu konstrui no sei utiliza provizoriu husi peregrinus sira, hodi nune’e sira bele konsentra hamutuk ba hodi bele deskansa ba no mós hodi prepara sira nia án molok hakatak ba partisipa misa solena iha Tasi Tolu ne’ebé maka sei prezide direita husi Sua Santidade Papa Fransisco.

Haree ba loron ne’ebé maka besik mai daudaun ona, ho nune’e maka Primeiru Ministru RDTL, S.E Sr. Kay Rala Xanana Gusmão ne’ebé mak akompaña mós husi Koordenadór Jerál Interinu Altu Nível Institusionál Vizita Sua Santidade Papa Francisco, Tomás do Rosário Cabral no membru governu sira enkontru ho Prezidente Autoridade Munisipál 13, no mós Diretór Ezekutivu ADN Sr. Rui Lourenço da Costa ho nia Ekipa iha Sekretariadu Vitikanu, ne’ebé maka lokaliza iha Faról, hodi deskute ajenda no fatin konsentrasaun peregrinu sira ne’ebé maka mai husi Dioseze Dili, Baukau no Maliana hodi partisipa misa iha Tasi-Tolu.

Remata enkontru, Xefe Governu akompaña hosi ekipa Ajénsia Dezenvolvimentu Nasionál (ADN) observa fatin ba selebrasaun misa. Iha observasaun ne’e haree direta ekipamentu sira ne’ebé monta ona no fbaraka bá sarani kada munisípiu nian ne’ebé maka komisaun organizadóra koloka ona.

Iha oportunidade hanesan, Primeiru-Ministru kontinua halo mós observasaun ba fatin konsetrasaun peregrinus sira husi Reziaun Administrativa Oé-Cusse-Ambeno (RAEOA) iha Tasi Tolu, no Dioseze Maliana no Ermera sei konsetra iha Tibar-Liquiça.

Entertantu, husi parte rai klaran nian ne’ebé maka kompostu husi munisípiu Covalima no Aileu sei konsentra hamutuk iha área Kasnafar, no Manufahi sei konsentra iha Manleuana. Ba peregrinus sira ne’ebé mai  husi parte Leste nian, Dioseze Baucau kompostu hosi Lautem, Viqueque, Baucau no Manatuto sei kontra iha Hera.

Observa tiha fatin konsentrasaun sira ne’e, Primeiru-Ministru husu bá komisaun organizadora atu kontinua halo preparasaun no koordena ho parte Dioseze tolu atu bele fasilita movimentu sarani sira hodi bele partisipa másimu no la’o ho di’ak to’o fatin selebrasaun Tasi-tolu, Dili. (Media_ADN)