Dili, 26/09/2024. Diretór Ezekutivu ADN Sr. Rui Lourenço da Costa hamutuk ho nia ekipa hala’o enkontru ho Embaixadóra Cuba ba Timor Leste Sra. Alina Aldama Innis no mós ekipa husi kompaña Eureka Unipesoál Lda. enkontru ne’e realiza iha edifisiu Embaixada Cuba ba Timor Leste, Avenida Direitus Humanos, Farol.

Iha enkontru ne’e ko’alia liu kona-ba konstrusaun ka rehabilitasaun Edifisiu no rezidensia Embaixada Cuba nian ba Timor Leste no Hafoin termina enkontru ho Embaixadóra no mós parte kompaña, Diretór Ezekutivu ADN haktuir katak ADN ohin iha enkontru espesial ida ho embaixada Cuba, inklusivamente hamutuk mós ho kompaña ne’ebé maka implementa projeitu rehabilitasaun ba embaixada Cuba iha Timor Leste. Diretór Ezekutivu ne’e hatutan katak Embaixadóra agradese tebes ba atensaun sira hodi hakarak hadi’a edifisiu no rezidensia embaixada Cuba nia ba Timor Leste.

“ iha enkontru ne’e embaixadóra agradese teb-tebes ba hotu-hotu hahu husi Prezidente Repúblika, S.E Primeiru Ministru, Ministru Turismu no mós Ministru Planeamentu no Investimentu Estrateziku  ba sira nia atensaun hodi hakarak hadi’a embaixada Cuba ne’ebé maka hetan apresiasaun  boot tebes husi Governu Cuba.” Haktuir Diretór Ezekutivu ADN Sr. Rui Lourenço da Costa hafoin termina enkontru ho Embaixadóra.

Embaixada Cuba ba Timor Leste Sra. Alina Aldama Inniss iha enkontru ne’e  aprezenta mós  ba ADN kona-ba parte minores ruma, ne’ebé maka presiza atu hadi’a tanba ne’e maka Diretór ADN hamutuk ho nia ekipa inklui mós ho kompaña  halo vizita hamutuk ho embaixada Cuba hodi ba observa direta no nota  katak iha buat ki’ik oan balun ne’ebé maka presiza atu hadi’a iha fulan hirak ne’e nia laran, atu nune’e obras ne’e bele intrega finalmente ba ona Embaixada Cuba.

Diretór Ezekutivu  ADN Sr. Rui Lourenço da Costa iha oportunidade ne’e hato’o mós nia agradesimentu ba kooperasaun di’ak no mós kompriensaun husi Embaixadóra Cuba, no iha vizita ne’e fo ona orientasaun ba kompaña relasiona ho púr minores balun, ne’ebé mak presiza atu fo atensaun detallamente atu nune’e bele konklui ona obra ne’e, wainhira konklui ona maka ADN sei hato’o karta ofisiálmente ba KAFI hodi informa katak projetu konklui ona, Sua Exelensia Prezidénte KAFI atuál Ministru MPIE hodi bele define ka determina serimonia ofisiál atu intrega obra ne’e ba Embaixada Cuba. (Media_ADN)