Dili, 23/09/2024. ADN,IP kompostu husi nia Diretór Ezekutivu Sr. Rui Lourenço da Costa hamutuk ho nia Adjuntu Diretór Ezekutivu Sr. Januario M. Guterres no mós Koordenadór sira, Xefi Seksaun sira, Assesor no Assesora sira no  funsionariu sira ADN,IP partisipa iha Retiru. Entertantu retiru ne’e rasik realiza iha Sitiu Turizmu Komunitaria Rabilau Maubisse Munisípiu Ainaro.

Hafoin susesu iha preparasaun simu vizita Sua Santidade Papa Fransisco, inklui vizita Sua Santidade nia mai Timor Leste durante loron tolu no husik hela Timor Leste hodi kontinua nia vizita ba nasaun Singapura. ADN, IP realiza kedas retiru hodi refleta hikas ba impaktu husi vizita Sua Santidade nian ne’ebé liu ba.

Tema ba Retiru ne’e maka diskusaun reflesaun kona-ba Impaktu husi Papa Fransisco nian, no retiru ida ne’e rasik fo husi Padre Venansio Pereira, SJ no hala’o loron tolu hahu husi loron 20 to’o loron 22 fulan Setembru tinan 2024.

Prezidente Komisaun Organizadóra Assesór UGA Sr. Nelson Soares Pinto haktuir katak atividade retiru no diskusaun ne’e realiza hodi refleta mós ba iha mensazén ne’ebé maka Amu Papa hato’o iha Tasi Tolu, iha CCD no fatin seluk tan durante vizita Sua Santidade nia iha Timor Leste.

“ Depois de ADN halo preparasaun hodi simu ita nia Santu Papa mai iha Timor, ami hanoin ami atu halo retiru ida ne’e, atu foti desizaun ba retiru ida ne’e,atu hodi refleta mós ba mensazén ida ne’ebé maka Amu Papa hato’o iha Tasi Tolu, iha CCD.” Hateten Prezidente Komisaun Organizadóra Assesór UGA Sr. Nelson Soares Pinto.

Nia haktuir mós katak liu husi atividade ne’e, superior husi ADN nian atu halo agradesimentu ida ba funsionariu hotu-hotu ne’ebé maka durante ne’e halo preparasaun hodi simu Papa mai Timor. Prezidente Komisaun Organizadóra Assesór UGA Sr. Nelson Soares Pinto haktuir mós katak hili fatin Sitiu Turizmu Komunitaria Rabilau Maubisse Munisípiu Ainaro nian ne’e tanba bele mós promove fatin turismu no mós bele hametin liu tan lasu amizade entre funsionariu hotu ne’ebé maka haknar an iha ADN,I.P.

Atividade lubuk ida ne’ebé hala’o iha atividade ne’e maka hanesan, Retiru ne’bé fo husi Pe. Venansio Pereira Sj, kontinua ho diskusaun grupu hodi responde ba pergunta sira ne’ebé fo husi Pe. Venansio Pereira, Sj maka hanesan; ba hau se maka Santu Padre Fransisco, Sentimentu sa-ida maka domina hau durante Papa nia Vizita no tanba sa, ba hau  momentu ne’ebé maka klimaks no iha esperensia sa-ida mak hau hetan. Hafoin diskusaun tiha iha grupu laran no kontinua ho aprezentasaun ba rezultadu husi diskusaun.

Diretór Ezekutivu ADN,I.P Sr. Rui Lourenço da Costa durante retiru, hato’o mós ba partisipantes tomak katak, ema hotu, igreza, Bispus,Nunsiu, se-se deit kontenti ho tékniku ADN sira hotu nia dezempeñamentu,atitude, no responsabilidade.

“ema hotu, igreza,Bispus,Nunsiu, se-se deit kontenti ho imi hotu,kontenti ho imi hotu-hotu nia dezempeñamentu, imi hotu-hotu nia atitude, imi hotu-hotu nia responsabilidade, Santu Padre iha  Luxemburg, koalia la lojika, tanba sa? Nia koalia tiha nia dehan, hau foin mai husi Timor, nia la hatete nia mai husi Indonézia, nia mai husi Singapura,hau foin mai husi Timor, ita rona anunsia lubuk ida, nia dehan hau foin mai husi Timor, konsolasaun ne’ebé maka hau sei sente,Santu Padre mós sente, tanba imi hotu-hotu ninia servisu, ne’e duni ba imi, ho ksolok ida ne’e maka hau hakarak dehan, hau la’o tiha pasiar ho imi mai iha fatin ida ne’e.” Hateten Diretór Ezekutivu ADN, I.P Sr. Rui Lourenço da Costa iha momentu retiru iha Rabilau

Remata retiru, kontinua ho selebrasaun misa iha estatua Nossa Senhora da Graça, Kruz, sinu, no Simbolu Cultura ne’ebé maka lokaliza iha foho tutun Rabilau nian. Remata misa iha foho tutun, kontinua ho atividade reflesaun no fogueira (Api Unggung ) no kontinua ho divertimentu. Molok termina atividade tomak iha sitiu turistiku Rabilau Maubise ba loron ikus nian ne’ebé monu iha loron dominggu nian nune’e atividade tomak ADN nian ne’e taka ho misa agradesimentu ne’ebé maka hala’o iha Kapela São José iha Raimori-Maubise.

Entertantu, Padre Venancio Pereira,SJ iha ninia homilia durante misa agradesimentu ba atividade retiru no reflesaun ADN,I.P nian ne’e hatete atu funsionariu sira hotu ne’ebé partisipa iha programa retiru ne’e atu agradese ba Diretór Ezekutivu no mós nia ekipa formadór, prepara funsionariu sira, atu sai mós lideransa ba aban bai-rua nian.

 “ohin ita agradese, ba Maun Rui no ekipa formadór no ekipa prepara imi atu sai lideransa aban bai-rua nian, ida ne’e mak Jesus dehan iha evanjellu, o lider ida, lós ga lae.se o hakarak servi, o hakarak sai lider, nia konsekuensia mak ida ne’e, o tenke sai ki’ik, o tengki sai atan ba sira, hein katak maun Rui,ekipa formadóra,ekipa lideransa nian, prepara buat hotu-hotu ho oportunidade ida ne’e, sai tebes imi nia hahalok moris nian, se maka hakarak ukun,se maka hakarak lidera, se maka atu sai boot,uluk nanain nia tengki sai atan.” Hateten Padre Venançio Pereira iha nia homilia durante misa agradesimentu.

Retiru katak rezigna-an, hela mesak, retira, hadook an husi atividade lorol-oron nian no hakbesik an ba Maromak nune'e ADN,I.P foti oportunidade diak ida ne'e hodi bele refleta hikas ba atividade tomak mak liu ona ba kotuk no hamutuk hateke hikas ba oin hodi haree ba servisu sira ne'ebe maka sei mai no hametin liutan lasu amizade no fraternidade entre ema hotu ne'ebe haknar-an iha ADN,I.P (Media_ADN)