Dli, 14/08/2024. Diretór Ezekutivu ADN Sr. Rui Lourenço da Costa no ekipa tékniku sira husi ADN hamutuk ho Prezidente RTTL, E.P Sr. José António Belo no nia ekipa halo observasaun ba iha fatin selebrasaun misa iha  Tasi Tolu.

Objetivu husi observasaun ne’e maka, husi parte RTTL, E.P bele haree daudaun ona fatin atu instala sira nia ekipamentu, hanesan OB-Van (Outside Broadcasting Van), Kamara crane no mós kamera Video Broadcasting nian inklui ekipamentu seluk ne’ebé maka relasiona ho servisu televizaun nian hodi prepara ba iha Transmisaun Misa ne’ebé maka sei prezide direita husi Sua Santidade Papa Fransisco.

Termina observasaun iha Tasi Tolu, ekipa hirak ne’e, kompostu husi ADN no RTTL,E.P kontinua hikas hakat ba iha Aeroportu Internationál Prezidente Nicolau Lobato no hamutuk ho Prezidente ANATL,E.P no nia ekipa hodi halo mós observasaun iha Aeroportu hodi haree fatin ne’ebé sei koloka Jornalista ba hodi halo kobertura ba Sua Santidade wainhira tun husi Aviaun, inklui  haree mós fatin konferensia imprensa nian iha Sala VIP. (Media_ADN)