Dili, 09/08/2024. Diretór Ezekutivu ADN Sr. Rui Lourenço da Costa hamutuk ho nia ekipa tékniku sira, akompaña Arsebispu Arkidioseze Metropolitana Dili, Dom Virgilio Kardeál do Carmo da Silva, Bispu Dioseze Maliana Dom Norberto do Amaral, Bispo Dioseze Baucau Dom Leandro Maria Alves, Reprezentante Santa Sé iha Timor-Leste Monseñor Marco Sprizzi, Koordenadór Jerál Interinu Altu Nível Institusional Vizita Sua Santidade Papa Francisco Mai Timor-Leste, no atual Ministru Administrasaun Estatal, S.E Tomás do Rosário Cabral, observa direita ba progresu konstrusaun Altar Tasi-tolu ne’ebé maka daudaun ne’e nia prosesu konstrusaun atinze ona pursentu 80.

Prasa Vatikanu ba Altar ne’e rasik nia konstrusaun hahu hatúr fatúk da-uluk iha loron 17 Abril tinan 2024, ne’ebé maka lansa husi Ministru Administrasaun Estatál (MAE) S.E. Tomas Cabral ne’ebé maka núdar mós Koordenador Jeral Interinu Altu Nível Institusionál Vizita Sua Santidade Papa Francisco hamutuk ho Arsebispu Arkedioseze Metropolitana Dili Dom Virgílio Kardeál do Carmo da Silva SDB, Monsiñor Marcos Sprizzi inklui Governantes balun no reprezentantes sira husi Igreja inklui veteranus sira no mós Diretór Ezekutivu ADN Sr. Rui Lourenço da Costa no nia ekipa sira.

Prasa Vatikanu ba Altar ne’e hamutuk mós ho Sakristia haat inklui toilet públiku ba Amu Papa, Kardeál, Bispu no Padre sira iha Tasi Tolu. Prasa Vatikanu ba Altar ne’e rasik sei utiliza hodi selebra Misa ne’ebé maka sei prezide direita husi Santu Papa Fransisco.

Aleinde hala’o vizita ba iha tasi tolu, Diretór Ezekutivu ADN Sr. Rui Lourenço da Costa hamutuk ho nia ekipa tékniku sira, akompaña Arsebispu Arkidioseze Metropolitana Dili, Dom Virgilio Kardeál do Carmo da Silva, Bispu Dioseze Maliana Dom Norberto do Amaral, Bispo Dioseze Baucau Dom Leandro Maria Alves, Reprezentante Santa Sé iha Timor-Leste Monseñor Marco Sprizzi, Koordenadór Jerál Interinu Altu Nível Institusional Vizita Sua Santidade Papa Francisco Mai Timor-Leste, no atual Ministru Administrasaun Estatal, S.E Tomás do Rosário Cabral, hala’o mós vizita ba katerdál Dili hodi observa mós kona-ba progresu rehabilitasaun Katerdál refere. (Media_ADN)