Dili, 05/08/2024. Primeiru Ministru RDTL, S.E Sr. Kay Rala Xanana Gusmão akompaña mós husi Ministru Administrasaun Estatal no atuál Koordenador Jeral Interinu Altu Nível Institusionál Vizita Sua Santidade Papa Francisco, S.E Tomás do Rosário Cabral, Ministru Planeamentu Investimentu no Estratéjiku S.E Gastão Fransisco de Sousa, Diretór Ezekutivu ADN Sr. Rui Lourenço da Costa, Adjuntu Diretór Ezekutivu ADN Eng. Januario M. Guterres, Manajér Jerál BTK Sr. Nasrul Nasim no  mós tékniku ADN, hala’o vizita servisu ba fatin konstrusaun Prasa Vatikanu ba Altar iha Tasi Tolu.

Vizita ida ne’e núdar vizita ba dala uluk nian husi Primeiru Ministru RDTL S.E Kay Rala Xanana Gusmão, ho nune’e hahu husi Ministrus to’o traballadór sira hotu-hotu kontenti tebes ho vizita ida ne’e. iha Intervista ho Media ADN, Diretór Ezekutivu haktuir katak Primeiru Ministru husu atu hotu-hotu servisu halo di’ak.

“ Ohin primeira vés monumentu Altar no Sakristia ka fatin konstrusaun ba misa solene hamutuk ho Santu Papa hetan Vizita husi Sua Exelensia Primeiru Ministru, hahu husi Ministrus to’o traballadór sira hotu-hotu kontenti teb-tebes, primeiru ministru husu atu hotu-hotu servisu halo didiak.”Hateten Diretór Ezekutivu ADN

Diretór Ezekutivu ADN ne’e hateten mós katak husi nia parte no mós husi ADN haksolok tanba konseptór ne’ebé maka hanoin atu halo monumentu ida ne’e ohin konsege mai vizita.

“ADN haksolok tanba konseptór ne’ebé maka hanoin atu halo monument ida ne’e ohin nia mai vizita, haree rasik saida maka ninia pensamentu konseitu sira tau iha konkretiza ka materializa iha konstrusaun ida ne’e, ne’ebé husu ba ADN sira hotu, traballadóres, kompaña hotu-hotu, ita hotu servisu hamutuk nafatin koordena halo preparasaun di’ak atu nune’e ita bele simu Sua Santidade PAPA mai vizita ita nia rain ho ksolok”. Diretór Ezekutivu ADN ne’e hatutan.

Prasa Vatikanu ba Altar ne’e rasik nia konstrusaun hahu hatúr fatúk da-uluk iha loron 17 Abril tinan 2024, ne’ebé maka lansa husi Ministru Administrasaun Estatál (MAE) S.E. Tomas Cabral ne’ebé maka núdar mós Koordenador Jeral Interinu Altu Nível Institusionál Vizita Sua Santidade Papa Francisco hamutuk ho Arsebispu Arkedioseze Metropolitana Dili Dom Virgílio Kardeál do Carmo da Silva SDB, Monsiñor Marcos Sprizzi inklui Governantes balun no reprezentantes sira husi Igreja inklui veteranus sira no mós Diretór Ezekutivu ADN Sr. Rui Lourenço da Costa no nia ekipa sira.

Prasa Vatikanu ba Altar ne’e hamutuk mós ho Sakristia haat inklui toilet públiku ba Amu Papa, Kardeál, Bispu no Padre sira iha Tasi Tolu. Prasa Vatikanu ba Altar ne’e rasik sei utiliza hodi selebra Misa ne’ebé maka sei prezide direita husi Santu Papa Fransisco. (Media_ADN)