Uaibobo, 04/07/2024. Diretór Ezekutivu ADN, Sr. Rui Lourenço da Costa, hamutuk ho Koordenadóra UCVQ-ADN Eng. Emerenciana da Costa Maia Freita, no mós ekipa tékniku ADN destakadu iha munisipiu Baucau iha loron 02/04/2024 liu ba akompaña Ministru Agrikultura, Pekuária, Peskas no Florestas S. E Eng.Marcos da Cruz hodi hala’o dialogu ho komunidade sira ne’ebé maka halo impedimentu ba iha konstrusaun irigasaun. Dialogu ida ne’e rasik realiza iha Hanau, baliza ho Suku Gariwai, baliza mós ho postu administrativu Quelikai, Postu administrativu Ossu no Postu administrative Venilale.

Molok hala’o enkontru ho komunidade sira, ba da-uluk, Ministru MAPPF konvoka uluk enkontru ho autoridade sira mak hanesan, Prezidente Autoridade munisipiu Viqueque, Reprezentante Prezidente Autoridade munisipiu Baucau, administradór Postu Ossu,Venilale no quelikai, Komandante Polisia, Komandante BOP,Komandante eskuadra Ossu, Xefi Suku sira no konsultan inklu kontratór sira.

Enkontru ne’e foku liu ba, problemas sira ne’ebé maka mosu iha tereñu liliu kona-ba impedimentu husi komunidade balu kona-ba konstrusaun irigasaun iha área refere. Enkonru ne’e realiza atu nune’e parte hotu bele fo ideia hodi nune’e bele hamutuk solusiona problema ne’ebé maka daudaun ne’e iha.

Diretór Ezekutivu ADN no nia ekipa, marka mós prezensa iha enkontru ne’e tanba hetan konvite husi Ministru MAPPF hodi nune’e bele fo apoiu hodi bele esplika ba komunidade sira katak sira iha direitu duni no tengki hetan duni benefisiu husi irigasaun ne’ebé mak atu konstrui ne’e,maibe husu mós atu komunidade bele kolabora katak sa-ida mak planu ona,sa-ida mak iha ona kontratu laran ne’e,ita respeita ida ne’e,hafoin buka solusaun ba problema ne’ebé komunidade sira levanta ho nune’e Ministru prezia tebes razaun tékniku tanba atu muda irigasaun tuir ezizensia husi komunidade nian ne’e sei hasai osan ne’ebé barak.

Ministru MAPPF akresenta katak, nia parte konvida ADN hodi partisipa iha dialogu ne’e, prinsipálmente iha buat rua, atu nune’ enjenéiru sira bele haree daudaun verifika kona-ba pedidu pagamentu husi kompaña ne’ebé mak sira karik hatama ona,no husu atu ADN azuda hodi verifika ka sura lisuk kona-ba adisionál ne’e.

Remata enkontru ne’e, Diretór Ezekutivu ADN, Sr. Rui Lourenço da Costa, hamutuk ho Koordenadóra UCVQ-ADN Eng. Emerenciana da Costa Maia Freita, no mós ekipa tékniku ADN destakadu iha munisipiu Baucau akompaña Ministru MAPPF no komitiva hodi tun direita ba iha mota ninian ne’ebé lokaliza iha Hanau, Suku Uaibobo, Postu Administrativu Ossu, munisipiu Viqueque nian hodi halo dialogu ho komunidade sira ne’ebé maka impede projeitu konstrusaun irigasaun ne’e rasik. (Media_ADN)