Governu Timor-Leste presiza promove prinsípius Governasaun di’ak iha instituisoens Estadu nian no iha Administrasaun Públika nia laran atu hasa’e kualidade prestasaun servisu knar nain sira ho objetivu prinsipál atendimentu ba públiku ho matenek.

prinsísipus governasaun di’ak hanesan efisiênsia, efikásia, transparênsia, responsividade, kontrolu akontabilitade, responsabilidade, moos husi korupsaun, partisipasaun ativa no profisionalismu.

“Governasaun” refere ba mekanizmu no prosesu husi asaun hirak ne'ebe foti hodi Estadu nia naran. “Governasaun” ne’e inklui desizaun no asaun ofisiál hotu-hotu ne’ebé instituisaun Públika sira foti no hala’o, inklui Parlamentu Nasionál no Governu, hodi ezerse podér ne’ebé Povu Timór-Leste fó ba sira tuir Konstituisaun RDTL haruka. “Governasaun” inklui prosesu sira iha tomada desizaun, alokasaun ba rekursu, orsamentasaun, estabelesimentu ba polítika, kriasaun programas no nia implementasaun.

“Governu” refere ba povu no instituisaun sira ne’ebé envolve hodi ukun nasaun ne’e. Iha ninia sentidu luan liu, “governu” inklui órgaun hotu-hotu Estadu nian, inklui Prezidente Repúblika, Parlamentu Nasionál, Governu, Judisiáriu no instituisaun relevante. Maske nune’e, espesífikamente, iha Timór-Leste“Governu”(ho letra boot “G”) refere ba Konsellu Ministrus no instituisaun hotu-hotu ne’ebé nia responsabiliza bá. “Governasaun”ne’e kona-ba prosesu ne’ebé instituisaun Públika sira uza hodi administra nasaun ne’e. “Governasaun” inklui foti desizaun sira, harii no implementa polítika sira, prosesu orsamentál no Governu nia relasaun ho povu Timor-Leste.

Boa-Governasaun ne’e prosesu kona-ba foti ka halo desizaun no implementasaun ba polítika no atividades ho maneira ida-ne’ebé efetiva, efisiente lejítima no justa. Boa-Governasaun asegura atu prosesu governasaun prienxe duni nesesidades povu Timór-Leste nian no promove sira-nia direitu.

Haree ba importansi husi Boa-Governasaun, ho nune’e maka Diretór Ezekutivu ADN Sr. Rui Lourenço da Costa simu iha nia servisu fatin Intervistadór husi Sentru Estudu ba Paz no Dezenvovlvimentu (CEPAD-Sigla Portugés) ne’ebé maka mai halo intervista ho D.E ADN hodi koalia foku liu ba atividade tomak ADN nia, Pratika Administrasaun iha ADN, ne’ebé maka kabé ba iha asuntu Boa-Governasaun no obedese ba lalaok Boa Governasaun iha Nasaun Tior Leste.

Atividade ne’e inisia husi CEPAD no PDHJ hodi halo peskiza ba Boa Governasaun iha liña ministerial sira,Institutu Públiku, Empreza Públiku, inklui Instituisaun Autonoma RAEOA, hodi sukat nivel koñesimentu aparelu estadu nian kona ba prinsipiu governasaun di’ak no ninia implementasaun iha funsionalismu públiku.

Atividade intervista no rekolla informasaun husi D.E ADN ne’e rasik realiza iha loron 19/06/2024 liu ba iha D.E ADN nia knar fatin ne’ebé maka lokaliza iha Bedik-Hun, Fatuhada, Dili Timor Leste. (Media_ADN)