RAEOA, 03/05/2024. Diretór Ezekutivu ADN, IP Sr. Rui Lourenço da Costa akompaña husi Assesora Prinsipál ADN, IP Sra. Eng. Cesaltina da Costa no mós ekipa tékniku ADN hala’o enkontru ho Prezidénti Autoridade Interino RAEOA atúal Sekretáriu Rejionál ba Asuntu Administrasaun Sr. Andre La’o no mós Diretór Obra Públika, Diresaun Rejionál Infraestrutura Sr. Remigio Nuno Sila hamutuk ho assessor no tekniku sira iha RAEOA. Enkontru ne’e rasik realiza iha salaun enkontru Prezidente Autoridade RAEOA.

Diretór Ezekutivu ADN,IP Sr. Rui Lourenço da Costa iha nia intervensaun relata ba iha Prezidente Autoridade RAEOA  no mós Diretór Obra Públika, Diresaun Rejionál Infraestrutura kona-ba ADN nia Prezensa iha RAEOA, Diretór Ezekutivu ne’e hateten katak, prezensa iha RAEOA ne’e atu ofisialmente hodi fo hatene ba Prezidente Autoridade RAEOA no Estrutura tomak katak ADN ofisialmente loke ona ninia ofisiu iha RAEOA.

“ Ohin hau mai ofisialmente atu fo hatene ba prezidente Autoridade RAEOA no strutura tomak katak ADN ofisialmente loke ami nia office iha ne’e, ne’e duni temporariamente ami tau enjeñeiru senior nain 2 ou nain 3 iha ne’e, sira sei lidera ekipa ida, konserteza sira nia servisu ou ita hotu-hotu nia knar iha implementasaun projeitus no mós ezekusaun projeitus sei la la’o se karik la-iha kooperasaun ne’ebé maka di’ak entre enjeñeiru sira iha Diresaun Infraestrutura nian,no mós se karik la hetan bensaun apoiu tomak husi strutura superior RAEOA ninian, Liga ho ida ne’e hau ohin mai ofisialmente fo hatene ba exelensias sira katak ADN ohin ofisialmente hahu ami nia misaun iha RAEOA”. Tenik Diretór Ezekutivu ADN Sr. Rui Lourenço da Costa iha nia Intervensaun.

Diretór Ezekutivu ne’e hatutan mós katak servisu sira ne’ebé maka ADN presiza halo iha RAEOA maka sei koopera besik liu ho strutura superior sira iha RAEOA, liliu Diresaun Rejionál Infraestrutura ninia hodi nune’e bele efetua ona diagnostiku sira.

“ Agora, servisu sa-ida maka ami presiza atu halo,maka sei koopera besik liu ho strutura superior RAEOA,liu-liu partikular ita nian Diresaun Rejionál Infraestruturas ninian para depois bele efetua ona diagnostiku sira, se karik mak iha prosesu ne’e nia laran, iha projeitu balun ezekuta ho di’ak, ninia progresu sira tengki halo ona backup data, sekarik la-iha backup data sira tengki halo ona backup data para depois ezekuta pagamentus, agora o que mais importante é que  projeitus ne’e selu ona ka seidauk iha anterior, ka foin maka atu selu, se selu ona entaun ita tengki hatene pagamentu ezekuta tiha ona hira para depois ita bele fo kontinuasaun ba pagamentus tuir mai”. Hatutan husi Diretór Ezekutivu ADN Sr. Rui Lourenço da Costa.

Lideransa masimu ADN ne’e salienta liu tan katak, sekarik projeitu ne’e selu tiha ona maka la ezekuta,entaun ADN hamutuk ho Diresaun rejionál Infraestrutura nian, la-iha kompetensias liu tan atu halo buat ida ne’e, so bele relata deit ba iha autoridade kompetente para depois ho ninia kompetensia rasik bele intrudus medidas ne’ebé maka apropriadas, ne’ebé maka la’os ona ADN ninian. Diretór Ezekutivu ne’e haktuir mós katak ADN mai meramente ou simplesmente para bele fo apoiu ba RAEOA atu bele hahu ho ne’e no hamutuk estabelese Sistema Jestaun infraestrutura iha Timor partikulár iha RAEOA.

Atu hakotu nia intervensaun iha enkontru ida ne’e, Diretór Ezekutivu ADN kontinua hato’o ninia esperansa katak ADN no RAEOA bele servisu hamutuk ho hanoin ida katak tengki brani atu sai transparenti, brani atu assume responsabilidades, ne’e duni liga ho ida ne’e maka ekipa ne’e sei azuda mós tekniku sira iha RAEOA para halo avaliasaun ba BoQ sira, tengki uza ona metodu Padraun ba Sasukat projeitu sira hodi atribui presu finál ba Projeitu, Diretór Ezekutivu ne’e espera katak  kuandu ida ne’e maka halo ona, ita la tauk, ne’e duni Sua Exelensia sira, hanesan lideransa Politiku iha liu korazén para atu foti desizoens, superior sira la tauk ona tanba ninia presu normál, nia presu superior RAEOA sira bele cek ba cek mai, sura ba sura mai, nia standar ne’e ADN nia, ADN mak responsabiliza ba presu sira ne’e, Superior sira foti desizoens atu adjusta direita ou prosesu tenderizasaun, superior sira iha RAEOA bele ona  brani hodi foti. Diretór Ezekutivu ne’e hato’o mós katak kontinua buka para estabelese Sistema ida ne’e halo didiak,para depois garante transpaaransia,utilizasaun osan públiku nian halo didiak, no konvida atu hotu-hotu servisu hamutuk ba dezenvolve RAEOA ne’ebé mak di’ak no furak liu tan.

Prezidente Autoridade RAEOA Interinu, atúal Sekretáriu Rejionál ba Asuntu Administrasaun Sr. Andre La’o hafoin rona tiha informasaun sira ne’ebé maka hato’o husi Diretór Ezekutivu ADN nune’e nia parte hato’o katak senti haksolok no antusiasmu ho prezensa ADN nian iha RAEOA, tanba tuir nia katak durante ne’e Prezidente Autoridade RAEOA buka dalan oin-oin no halo konsultasaun ho ADN atu halo kooperasaun servisu ho Inspesaun Jerál para bele iha transparensia, nakloke mai Oecusse

“ Ami apresia tebes, ami simu ita boot sira nia prezensa iha ne’e tanba ita haree iha ne’e liuliu ba infraestrutura iha Oecusse ne’e, durante mandatu besik tinan sanulu ona iha Oecusse, ne’ebé orsamentu ne’ebé boot mais ita haree Infraestrutura ne’e ita haree kualidade, kualidade duni maibé foin daudauk tinan rua liu ba,agora hela projeitu barak iha Oecusse,hanesan estradas, pontes,hanesan uma edifisiu balun iha Oecusse,agora hanesan,ami membru autoridade hamutuk ho nai Prezidente Autoridade iha Oecusse, seidauk halo pagamentu, tanba ami duvida hela ba ita nia infraestrutura iha RAEOA, tanba ne’e,mak hanoin husi nai Prezidente Autoridade rasik, para bele buka dalan, konsulta ho ita boot sira hanesan ADN, atu koopera hamutuk ho inspesaun jerál, tékniku sira hotu iha nivel altu para bele iha transparensia, nakloke mai Oecusse,para bele azuda ami iha ne’e,atu bele hare fila fali,prosesu ne’e para lalika  abandona demais iha Oecusse, tanba infraestrutura ne’e barak demais iha Oecusse, ita uza orsamentu boot tebtebes ba Oecusse mais,povu seidauk senti katak sa-ida maka dezenvolvimentu”. Hateten Prezidente Autoridade RAEOA Interinu, atúal Sekretáriu Rejionál ba Asuntu Administrasaun Sr. Andre La’o

Entertantu, Diretór Obras Públika, Diresaun Rejionál Infraestrutura Sr. Remigio Nuno Sila ne’ebé partisipa mós iha enkontru ne’e hato’o mós nia agradesimentu ba iha prezensa ADN nia ho ofisialmente iha RAEOA, husi nia parte kontinua agradese tanba tuir nia katak ba oin ADN bele akompaña Diresaun Infrestrutura hodi bele haree hikas fali ba iha Projeitu sira.

“ Agredese ba ita boot sira nia prezensa, ida ne’e maka hau nia esperansa durante ne’e, hanesan durante hau servisu,seidauk flexible liu tanba prezenti ita boot sira nian maka seidauk iha, hau koordena ona direita dala rua ba iha nasionál maibé Direitór la-iha fatin entaun hau sempre komunika direita ho exelensia sira iha ne’e no membru sira iha ne’e, agradese Bem Vindo nafatin  mai iha RAEOA hodi nune’e ita bele akompaña ami liliu infraestrutura, atu bele haree fila fali projeitus iha Grandes Projeitus Nasionál ninian, no mós projeitus rezionais, ida ne’e maka servisu prinsipais, ne’ebé husu nafatin ita boot sira nia tulun”. Hateten Diretór Obras Públika, Diresaun Rejionál Infraestrutura Sr. Remigio Nuno Sila

Diretór ne’e informa mós katak daudaun ne’e sira forma hela ekipa ida, maske ekipa ne’e rasik seidauk hetan aprovasau husi Prezidente Autoridade RAEOA, nia haktuir katak daudaun ne’e ekipa ne’e maka kontinua halo fiskalizasaun, ekipa ida ne’e hanaran Unidade tekniku fiskalizasaun ba projeitus sira hotu-hotu,sei kobre projeitus sira hotu-hotu,tantu husi projeitus nasionais no mós projeitus rejionais. Ekipa ida ne’e karik aprovadu, ekipa ida ne’e sei kontinua servisu koopera hamutuk ho ekipa ADN para oinsa hamutuk halo fiskalizasaun ba iha projeitus ne’ebé maka la’o hela iha RAEOA tenik Diretór Obras Públika Diresaun Rejionál Infraestrutura RAEOA ne’e.

Entertantu tékniku ADN ne’ebé maka sei destaka iha RAEOA ne’e rasik hamutuk ema nain tolu maka hanesan, Eng. Jose Aparicio, Eng. Camilio de Jesus no Eng. Jaimito M. Quintão. (Media_ADN)