Manatuto, 04/05/2024. Adjuntu Diretór Ezekutivu ADN, IP Eng. Januario M. Guterres hamutuk ho ekipa tékniku husi ADN, IP partisipa iha Serimonia Inagurasaun Portál no Balkaun Uniku iha Munisipiu Manatuto.

Governu Timor Leste liu husi Ministeriu Administrasaun ESTATAL ho nia esforsu tomak estabelese balkaun uniku, nune’e maka iha loron 04/05/2024 liu ba S.E. Primeiru Ministru Kay Rala Xanana Gusmão halo ona Lansamentu ba Balkaun Uniku ne’ebé maka lokaliza iha  Munisipu Manatuto.

Iha nia intrvensaun, Primeiru Ministru hateten katak lansamentu ida ne’e importante tanba kria ona baze dadus ba sentralizasaun Governu lokál maibé la signifika atu funsionariu sira tur deit maie atu funsionariu sira servisu atu haree buat ne’e la’o oinsa.

“ Balkaun Uniku kapás, digitalizasaun ne’e kapás, maibé laos atu fasilita imi nia servisu atu imi tur deit, lae, ne’e hodi imi servisu atu haree, buat ne’e la’o oinsa. Hateten PRimeiru MInistru.

Primeiru Ministru hatutan mós katak ida ne’e sentidu hodi hakat ba oin maibé foin maka hahu, ho nune’e husu ba ema hotu servi povu tuir funsaun no ho responsabilidade.

Miistru Administrasaun ESTATAL S.E Tomas Cabral iha nia intervensaun haktuir mós katak lansamentu ba Balkaun Uniku ne’e la’os deit halo iha Manatuto maibé iha loron hanesan hala’o mós iha munisipiu Liquiça no hetan mós apoiu 100% husi PNUD.

“iha Dili ita halo tiha ona lansamentu no hetan apoiu husi Uniaun Europeia no mós Portugál, tuir mai ita mós sei lansa iha BAUCAU no Manufahi, Munisipiu seluk sei iha hotu tinan ida ne’e”. hateten Ministru MAE.

Balkaun Úniku ne’e núdar inovasaun ida iha fornesimentu informasões no servisus públikus ba sidadaun sira no mós setór privadu sira. Hanesan modelu servisu foun ne’ebé maka oferese atensaun personalizada iha espasu físiku ida ne’ebé úniku iha nível lokál.

Ho promosaun ba kultura inovadóra iha prestasaun servisu ba Administrasaun Públika, objetivu husi Balkaun Úniku ne’e atu reduz birokrasia no korupsaun, simplifika prosedimentus sira, aselera no moderniza prestasaun servisu públiku sira.

Iha ninia versaun digitál, Balkaun Úniku hanesan fonte konfiável ida no seguru ba asesu informasaun kona-bá prosedimentus ba asesu servisus públikus, konstitui hanesan feramenta importante ida ba transparânsia ativa.

Parseiru Importante balkaun uniku ne’e maka Ministériu Justisa, nune’e ita sei asesu ba servisu sira husi Diresaun Jerál servisu Rejistu no Notariadu hanesan Billete Identidade, Rejistu Kriminál, halo pasaporte no mós Resensiamentu Eleitorál Biometriku hirak ne’e hotu bele asesu através portal balkaun uniku husi liña portal.municipio.gov.tl/balkaun-uniku/. (Media_ADN)