Lansamentu Hatúr Fatuk Da-huluk ba Konstrusaun Futuru Edifisiu ADN Iha RAEOA
- Publika husi: Maximiano
- Loron: 29/May/2024
RAEOA,29/05/2024. ADN núdar Instituisaun Públiku ida ne’ebé maka
Estadu harii ho Knar atu tau matan ba implementasaun, Planu no mós
implementasaun projeitus sira hotu, liga ho ida ne’e prezensa ADN iha RAEOA
importante tebes,atu fo apoiu ba parte sira hotu ne’ebé maka servisu iha área
infraestruturas inklusivamente kompaña sira hotu-hotu atu sira bele hala’o knar
ho lolos, halo didiak, no ho prinsipiu ida katak atu fo valór ba osan povu nian,
públiku nian ne’ebé maka gasta ba investimentu iha infraestruturas,no mós liu
husi servisu ne’ebé maka atu garante transparensia ho responsabilidade ho
lolos, tantu husi tékniku sira husi ADN nian, no mós husi Obras Públikas,liuliu
sira ne’ebé servisu iha tereñu halo implementasaun ba projeitu ho nune’e maka
simbolikamente ADN hahu harii Edifisiu no nia rezidénsia ofisiál tanba tinan
barak nia laran ADN la marka prezensa iha RAEOA no ho politika IX Governu
Konstitusionál nian ne’ebé maka lideradu husi Primeiru Ministru S.E Kay Rala
Xanana Gusmão nian no mós ho lideransa husi Prezidénti Autoridade RAEOA nian
S.E. Rogerio Tiago Lobato nian, ne’ebé maka ho laran haksolok husu bebeik ADN atu
fila hikas ba RAEOA ho nune’e maka Prezidénte RAEOA fo fatin ba ADN hodi
instala hikas nia edifisiu iha RAEOA.
Diretór Ezekutivu ADN Sr. Rui Lourenço da Costa iha
intervista hateten katak atividade ne’e importante tebes ba ADN la’os deit ba ADN
maibé mós ba parte hotu.
“Serimonia Lansamentu hatúr fatuk da-uluk ne’e
importante tebes la’os deit ba ADN nia servisu iha futuru mai, maibé mós atu
hatudu ba parte hotu-hotu katak ADN fila hikas ona mai iha RAEOA Hala’o ami nia
knar tuir lei ne’ebé maka investe ba ami katak ami sei halo verifikasaun,
inspesaun no kontrolu ba kualidade ba projeitu sira hotu. Laos deit iha Dili,
laos deit iha rai boot, maibé iha mós RAEOA no hahu ohin ami hahu ona instala
ami nia fatin, lansa primeira pedra ba futuru edifisiu ADN nian maibé ami mós
lansa ami nia servisu sira hotu-hotu ne’ebé maka ami hahu ona”. Hateten Diretór Ezekutivu ADN Sr. Rui Lourenço da
Costa.
Entertantu konstrusaun ba Edifisiu foun no mós
rezidénsia ofisiál ADN nian ne’e rasik responsabiliza husi Kompaña RAINALDO’S
no lokaliza iha Suku Costa Sub Rejiaun Pante-Makasar, Rejiaun Administrativa Oé-Cusse Ambeno (RAEOA).
Serimonia hatúr fatuk da-uluk ba konstrusaun Edifisiu
no rezidénsia ofisiál ADN nian ne’e rasik lidera direita husi Diretór Ezekutivu
ADN Sr. Rui Lourenço da Costa no hetan bensaun husi Padre Paroku Numbei Reverendisimu
Padre Julio do Carmo. Marka mós prezensa iha serimonia Lansamentu hatúr fatuk
da-uluk ne’e mak hanesan Xefi UCVQ-ADN Sra. Emerençiana da Costa M. Freitas,
Xefi EPAS-ADN Arc. Francisco X de Jeronimo, Assesora Prinsipál D.E ADN Eng. Cesaltina da Costa Morreira, tékniku
ADN destakadu iha RAEOA, tékniku Laboratoriu ADN, repzentante Obras Públika
Diresaun Rejionál Infraestrutura RAEOA, Teras Propriedade RAEOA, Autoridade
Lokál, Padre no mós Kompaña implementadór ba projetu konstrusaun edifisiu no
mós rezidénsia offisiál ADN nian iha RAEOA. (Media_ADN)
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;