Dili, 19/04/2024. Diretór Ezekutivu ADN Sr. Rui Lourenço da Costa hamutuk ho nia ekipa, akompaña Ministru Administrasaun Estatál (MAE) S.E. Tomas Cabral ne’ebé maka núdar mós Prezidente Komisaun Organizadór ba Resepsaun Sua Santidade Papa nia vizita mai Timor Leste hamutuk ho Arsebispu Arkedioseze Metropolitana Dili Dom Virgílio Kardeál do Carmo da Silva SDB, Monsiñor Marcos Sprizzi inklui Governantes balun no reprezentantes sira husi Igreja inklui veteranus sira hala’o lansamentu hatúr fatúk da-uluk ba iha konstrusaun Altár Selebrasaun Misa ne’ebé maka sei prezide direitamente husi Sua Santidade Papa Francisco durante hala’o nia vizita mai iha Timor Leste iha loron 9 to’o 11 fulan Setembru tinan ne’e. Serimonia hatúr fatuk da-uluk ne’e rasik hala’o iha areadór Tasi Tolu Dili Timor Leste.

Ministru Administrasaun Estatál iha nia intervensaun hato’o katak serimonia lansamentu hatúr fatúk ba dahuluk ne’e núdar preparasaun hamutuk husi Governu no Igreza Katolika liu husi kordenasaun diak hodi estabelese fasilidades infraestrutura ba misa iha Tasi Tolu, bazeia nafatin ba orientasoens liturjikus husi Vatikanu.

“Ita nudar parte ida husi Estadu, Governu nia responsabilidade mak prepara kondisoens maibé ita la ses husi Igreza lokál no vatikanu nia vizaun. Konstrusaun ida ne’e hala’o tiha ona, só ohin mak ita bele lansa, tan konsidera sei konfidensial hela. Maibe Poz de anunsiu official husi Igreja Timor Leste, iha semana liu ba, ohin ita halo lansamentu primeira pedra ba prasa monumental no mos Altar Santu ba Missa Campal Sua Santidade Papa iha ita nia rain. Hateten Ministru Administrasaun Estatal hanesan ulun boot ba preparasaun vizita husi Sua Santidade Papa.

Liu tan Ministru mós informa katak tuir Governu nia hanoin fatin refere tenki sai ona fatin sagradu ne’ebé konsagradu ba aktividades ka selebrasaun missa Igreja katólika nian. Parte husi fatin ne’e sei iha mós fatin destinadu ba Museu istória Igreja nian iha Timor Leste.

Fundamenta ho konseitu ne’ebé atuál Governu hakarak dezenvolve liu tan ba area refere ho perspektiva atu sai monumentu ho memoria ida ne’ebé eternamente husik hela ba Timor oan tomak husi jerasaun ba jerasaun Ministru Estatál husu ba A.D.N. atu hahu harí lutu hodi Evita atu utilizasaun ba fatin refere ba objektivu seluk. 

“preparasaun husi parte Igreja nian atu bele servisu hamutuk nafatin ho ekipa tomak tuir programa ne’ebé maka iha ona no husu mós ba Governu atu bele fasilita populasaun no sarani tomak kona-ba transporte hodi bele mobiliza ema hotu iha eventu boot ida ne’e hodi bele kria paz no estabilidade iha Timor-Leste. Amu Kardeál mós fo apresiasaun ba servisu ADN nian no admira tebes tamba, foin maka fulan ida resin deit maibe, nafatin hatudu prestasaun servisu ne’ebé diak no husu ba entidades hotu reza atu vizita ida ne’e bele sai duni realidade ida iha Ita-nia rain. Hateten Sua Eminensia Dom Virgílio Kardeál do Carmo da Silva SDB iha nia diskursu.

Entretantu, reprezentante Sua Santidade nian iha Timor Leste, Monsiñor Marcos Sprizzi rekoñese katak, esforsu Governu ba preparasaun ne’ebé di’ak tebes, no lori Santa Sé nia naran agradese ba servisu hotu ne’ebé halo hela iha preparasaun ba eventual vizita Papa nian mai Timor Leste. (Media_ADN)