ADN Partisipa Formasaun Environmental Safeguards ne’ebé Fornese husi ADB
- Publika husi: Maximiano
- Loron: 18/Mar/2024
Díli, 15/03/2024. Formasaun ba rekursu umanu importante tebes hodi mellora liu tan tékniku no funsionáriu sira nia abilidade hodi nune’e bele atinji ba metas no objetivu sira ne’ebé maka instituisaun iha, susesu husi instituisaun ida nian depende mós ba iha kualidade husi rekursu umanu ne’ebé maka hola parte iha instituisaun refere nia laran.
Dezenvolvimentu ba rekursu umanu importante tebetebes liu husi forma tékniku sira ka funsionáriu sira ho kualidade performa ka dezempeñu ne’ebé maka di’ak. Importánsia husi formasaun la’os deit fo benefísiu ba instituisaun ne’ebé maka tékniku ka funsionáriu sira hola parte ba maibé útil mós ba tékniku ka funsionáriu sira iha ho meius hetan ka aumenta sira nia abilidade hodi nune’e apoiu sira nia karreira iha futuru mai.
Importánsia husi formasaun rekursu umanu ba instituisaun maka, bele prepara an hodi hasoru dezafius hotu ne’ebé maka karik sei akontese iha futuru mai, preparadu liu hodi kompete ho kompetitor sira iha área espesífikadu sira, prontu adapta ho lais relasiona ho mudansa teknolojia ne’ebé maka avansadu hanesan tempu ida agora nian, konsege kria produtu ne’ebé ho kualidade ba parseiru dezenvolvimentu sira hodi nune’e bele gaña imajen ne’ebé maka pozitivu ba parseiru dezenvolvimentu sira, konsege prepara tékniku sira ka funsionáriu sira hodi nune’e bele tuur iha kargus importantes sira.
Benefísiu husi formasaun rekursu umanu ba tékniku sira ka funsionáriu sira maka, hasa’e sira nia prutividade, interpersonal Skill ne’ebé maka tékniku sira ka funsionáriu sira iha hetok sai di’ak liu tan ba futuru, kada tékniku ka funsionáriu nia intendimentu sai mellor liu tan no responsabilidade ho servisu sira ne’ebé maka atribui ba sira husi sira nia superiór, konsege minimiza akontese fallansu ne’ebé maka bele fó impaktu ba instituisaun.
Haree ba importánsia husi formasaun rekursu umanu, ho nune’e maka ADN eskolla nia tékniku ka funsionáriu sira hodi ba tuir formasaun ne’ebé maka fornese husi Banku Dezenvolvimentu Aziatiku (ADB-Sigla Inglés) ho tópiku ba formasaun ne’e maka “ Salvaguarda Ambientál” ne’ebé maka organiza husi ekipa Salvaguarda ADB nian.
Formasaun ida ne’e nu'udar formasaun dahuluk nian ne’ebé maka kobre ba iha setór operasionál ADB nian, adopta mós ba iha aproximasaun Pratika ida ho sesaun servisu grupu, aprezenta vídeo jestaun safeguard nian, promove mós atribuisaun koñesimentu no kriasaun rede servisu entre partisipantes sira.
Entretantu formasaun ne’e rasik hala’o durante loron tolu hahú husi loron 12-14 Marsu tinan ida ne’e no realiza iha Hotel Timor, Dili, Timor Leste. (Media_ADN)
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;