Díli, 26 Juñu 2023: Diretór Ezekutivu Ajénsia Dezenvolvimentu Nasionál, Institutu Públiku (ADN, I.P.), Eng. Mariano Renato Monteiro da Cruz akompaña husi Diretór Adjuntu, Eng. Januario Maia Guterres, Asistente Diretór Ezekutivu, Eng. Johanes Hornay ho ekipa partisipa iha serimónia lansamentu Sistema Informação gestão projeto (SIGP), sistema informação geografica dos projetos (SIG) no Web Portal MOP (www.sigp.mop.gov.tl; www.gis.mop.gov.tl; www.mop.gov.tl) iha salaun enkontru Gabinete MOP Caicoli.

Iha lansamentu ne’e, Diretór Ezekutivu iha nia intervesaun, konsidera sistema ne’ebé MOP kria importante tebes tanba ita hakarak sistema ne’e bele fó transparénsia informasaun ba públiku, liu husi transforma sistema servisu manuál ba eletróniku ka online hodi fasilita servisu no pasa informasaun ba malu liu husi online, liu-liu kona-ba projetu atu entidade seluk no públiku bele asesu.

Tanba durante ne’e ADN, avalia projetu sira no identifika katak tenke hadi’a sistema servisu, liu-liu kona-ba levantamentu dadus tanba dala barak sistema hatudu katak preparasaun dokumentu mak ladún di’ak.

Iha entrevista ho media nasionál sira, Diretór Ezekutivu hatete katak projetu barak mak hetan ona aprovasaun husi Parlamentu Nasionál, no promulgadu husi Prezidente Repúblika maibé la konsege ezekuta tanba dokumentu la preparadu. Sistuasaun ne’e ADN deskobre katak di’ak liu projetu sira ne’ebé implementa, presiza dokumentu sira preparadu, orsamentu aprova ona maibé dokumentu nunka mosu iha ADN no ha’u iha dadus projetu husi tinan 2020 to’o 2023, no iha projetu lubuk mak hetan ona aprovasaun maibé to’o agora ha’u sidauk simu, ida ne’e ita la aprova tanba seidauk haruka mai hodi verifika tanba liu husi verifikasaun mak foin bele lori ba prosesu aprovizionamentu no halo konkursu públiku.

Diretór Ezekutivu mós agradese no louva ho empreza timoroan nian ne’ebé ho ninia kapasidade tomak bele kria ona sistema refere.

Iha okaziaun ne’e Ministru Obras Publika Dr. Abel Pires da Silva hatete katak krisaun ba sistema ne’e hetan inspirasaun husi ADN, I.P. nia sistema Project Management Information System (PMIS) ne’ebé lansa iha tinan 2021. Tanba ADN wainhira iha reuniaun sira CAFI nian sempre halo aprezentasaun dadus projetu ho konkretu.

MOP nu’udar Ministériu ida ne’ebé jere projetu ho orsamentu boot ba obra publika sira maibé durante ne’e halo kontrolu liu husi serbisu manuál de’it nune’e hasoru difikuldade barak. Ohin konsege lansan sistema rua importante hodi fasilita sistema serbisu iha MOP, bele halo Tranzisaun prosesu manuál ba dizitalizasaun, jere no disjitaliza prosesu administrasaun dadus projetu, tracking dokumentu projetu inklui mós integra ona ho sistema ADN nian no mós konekta entidade hotu iha MOP.

Públiku bele asesu ba: www.mop.gov.tl ne’ebé mós iha ligasaun ho Ajénsia Dezenvolvimentu Nasionál, Institutu Públiku (ADN, I.P), nune’e dokumentu projetu sira iha hotu ona sistema laran.

“Hein katak iha tempu oin mai MOP, ADN, no CAN bele halo serbisu di’ak liután wainhira iha realiza konkursu publiku ruma, no husu ba governu foun mai kontinua jere sistema ne’e hodi servi di’ak liutan povu” termina, Ministru MOP.