EQUIPA DE VALIDAÇÃO E BASE DE DADOS HALA’O TREINAMENTU BA ENJEÑEIRU NO NON-ENJEÑEIRU ADN, I.P.

Díli, 09 Janeiru 2023 - Ajénsia Dezenvolvimentu Nasionál, Institutu Públiku (ADN, I.P.) liu husi Gabinete Diretór nia parte Equipa de Validação e Base de Dados (EVBD) hala’o treinamentu ba enjeñeiru no non-enjeñeiru ADN, I.P. kona-ba sistema melloramentu hanesan LMS, HR Sistem, Company profile no mós GIS, iha sala reuniaun MPO/ADN Fatuhada.

Diretór Ezekutivu ADN, I.P. Eng. Mariano Renato Monteiro da Cruz hala'o abertura ba treinamentu ne’e no akompaña mós husi Diretór Adjuntu ho koordenadór sira. Antes hahú Diretór Ezekutivu fó hanoin ba partisipante hotu atu partisipa ho másimu ba matéria ne’ebé tékniku ekipa base de dados aprezenta tanba sistema ne’e importante tebes no agora daudauk tama ona ba tempu modernu tanba ne’e funsionáriu hotu-hotu tenke abitua utiliza sistema eletróniku hodi komunika ba malu atu bele fasilita di'ak liután servisu iha instituisaun laran.

Treinamentu durante loron tomak ida kona-ba sistema online ne’ebé utiliza hodi trata dokumentus sira iha parte administrasaun hanesan karta tama no karta sai liu husi sistema sira hanesan LMS, HR Sistem no Company Profile enkuantu sistema GIS mak sistema ida ne’ebé enjeñeiru sira utiliza hodi kolekta dadus ne’ebé iha relasaun ho projetu infraestrutura sira iha teritóriu tomak ne’ebé kabe ba kontrolu ADN, I.P. nian.