Díli, 22 Dezembru 2022- Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Eng. Mariano Renato Monteiro da Cruz ho Adjunto Diretór Ezekutivu Eng. Januario M. Guterres hamutuk ho koordenadór, xefi departamentu, asesór inklui mós funsionáriu ADN nian hala’o retiru ho tema “Avalia Dezempeñu Servisu 2022 no Elaborasaun Planu Estratéjiku ADN, I.P. Períodu 2023-2028" iha salaun Luz Clarita.

Atividade hetan abertura hosi Xefi Gabinete Vise Primeiru Ministru no Ministru Planu Ordenamentu, Sr. José Lourenço C.C Pereira Mestre, hodi hato’o mensajén ba ADN, I.P. katak atividade avaliasaun ida ne’e importante tanba haree ba ADN nia pasadu ne’ebé infrenta problema sira hanesan menus rekursu umanu, fasilidade, fatin inklui mós orsamentu maibé to’o daudaun ne’e ADN hala’o nafatin esforsu servisu ho di’ak hodi implementa servisu sira tuir orientasaun no konfiansa hosi governu no estadu.

Tanba ne’e nia husu atu hatudu nafatin espiritu servisu no partisipasaun másimu hodi kontribu ba dezenvolvimentu ADN, I.P. nian hodi hala’o servisu tuir planu ba tinan 5 tuir mai. Nune’e nia (Xefi Gabinete) husu atu haree didi’ak ba servisu tékniku no administrasaun nian ne’ebé sedauk di’ak presiza atu hadi’a di’ak liután ba oin hodi garante funsionalidade instituisaun.

Nune’e mós Xefi Gabinete lori S.E VPM/MPO ho nia naran rasik, hato’o apresiasaun boot ba Diretór Ezekutivu ADN ho kargus xefia, tékniku sira inklui mós administrativa sira hotu nia esforsu tomak hodi implementa programa, sub programa no atividade sira iha ADN durante tinan 2022 nian ne’ebé la’o ho di’ak.

Hafoin ne’e kontinua ho Diretór Adjuntu ne’ebé halo aprezentasaun kona-ba rezultadu servisu ADN, I.P. nian durante tinan 2022, nune’e mós halo diskusaun kona-ba planu estratéjiku ADN ba tinan lima oin mai hodi divide ba grupu 3 ne’ebé bele fó opiniaun Dezenvolvimentu Infraestrutura, Dezenvolvimentu Rekursu Umanu no Dezenvolvimentu Institusionál atu oinsa perspetiva ba ADN nian ba tinan lima oin mai (2023-2028).

ADN atu la’o ba oin di’ak liután presiza rerforsa área kapasitasaun ba enjeñeiru sira, aumenta fasilidade, rekursu umanu no hadi’a komunikasaun servisu tantu internu no mós externu maibé atu realiza pontu importante hirak ne’e funsionáriu ADN sira hotu nia kreatividade no inovativu hodi hala’o servisu ida ne’ebé atu bele lidera di’ak liután instituisaun iha futuru.

Antes ensera Diretór Ezekutivu ho Estrutura deseja Boas Festas ba funisonáriu tomak no Deseja Tinan Foun 2023 lori enerjia foun, hanoin foun hodi nafatin servi Estadu liu husi kontrolu kualidade ba obras insfraestrutura sira ne’ebé kabe ba instituisaun nia responsabilidade.