GRUPU TÉKNIKU INTERMINISTERIÁL FIBRA ÓPTIKA HALA’O VIZITA TRABALLU BA AUSTRÁLIA

Austrália, 23-30 Novembru 2022: Grupu Tékniku Interministeriál Fibra Óptika ne’ebé lidera husi Koordenadór ba projetu Cabo Fibra Óptica-Timor-Leste South Submarine Cable (TLSSC) Sr. Romualdo Duarte Guterres ho ekipa hala’o vizita traballu ba Austrália hahú husi loron, 23 to’o 30 Novembru 2022.

Vizita Grupu Tékniku Interministeriál (GTI) realiza tanba hetan konvite husi Departamentu Negósiu Estranjeiru no Komérsiu/Department of Foreign Affairs and Trade (DFAT) hodi haree direta estasaun Cabo Aterragem iha sidade Darwin, aleinde mós iha Melbourne hala’o enkontru ho Vocus hodi haree kona-ba Sentru Operasaun ba servisu Fibra Óptika nian.

Ekipa GTI durante estadia iha vizita ne’e atende mós enkontru ofisiál sira husi Governu Australia nian iha Canberra, inklui ajénsia polítika reguladora husi Australia ne'ebé tau matan ba Kabu submarinu sira, nune'e mós ho ekipa Departamentu Negósiu Estranjeiru no Komérsiu/Department of Foreign Affairs and Trade (DFAT) no Infra-estrutura Australiana Finansia iha Instalasaun ba Pasífiku/Infrastructure Financing Facility for the Pacific, (AIFFP), no karik bele extende tan enkontru ho DFAT nia ekipa ne'ebé tau matan ba Cyber Security.

Vizita ne'e sei haforsa liu tan kompriensaun ekipa Grupu Tékniku Interministeriál (GTI) kona-ba setór telekomunikasaun Austrália nian, ho Kompañia Vocus nu'udar na'in no operadór ba Sistema Cabo North West ka North West Cable System (NWCS), no mós ho ajénsia Governu Austrália nian ne'ebé iha responsabilidade ba polítika telekomunikasaun nian, infraestrutura, cybersecurity no regulamentu.