DIRETÓR EZEKUTIVU ADN, I.P. PARTISIPA REUNIAUN SEMINÁRIU PROGRESU EZEKUSAUN OJE HUSI 1 JANEIRU TO’O 30 JUÑU 2022

Loron kinta, 7 Jullu 2022 - Diretór Ezekutivu Ajénsia Dezenvolvimentu Nasionál (ADN, I.P.), Eng. Mariano Renato M. da Cruz, akompaña husi Adjuntu Diretór Ezekutivu, Eng. Januario M. Guterres, Koordenadór UGA, Sr. Nelson S. Pinto, Xefi Validasaun Base de Dados, Eng. Susana Sinala do Rego Amaral partisipa iha reuniaun “Progresu Ezekusaun OJE husi 1 Janeiru to’o 30 Juñu 2022”, ne’ebé lidera husi Vise-Ministru Finansas, António Freitas iha salaun Auditóriu Kay Rala Xanana Gusmão, Ministériu Finansas, Aitarak Laran, Díli.

Konteúdu ba semináriu ne’e aprezenta kona-ba Sumáriu Ezekusaun OJE kada fundu, Ezekusaun OJE RAEO, Ezekusaun OJE ba Instituisaun Governu ne’ebé nia ezekusaun menus husi 10%.

Iha biban hanesan Diretór Ezekutivu halo mós aprezentasaun kona-ba Sistema serbisu ADN ninian ne’ebé utiliza hodi halo kontrolu ba projetu infraestrutura sira ne’ebé iha ADN ninia kontrolu hanesan serbisu verifikasaun, inspesaun ba projetu sira.

Diretór Ezekutivu mós afirma katak papel ADN nian atu halo kontrolu kualidade ba projetu sira, maibé ida ne’e sei la monu husi lalehan, wainhira projetu na’in sira la prepara ema tékniku atu halo supervizaun ba ninia projetu rasik.

Kontrolu kualidade ba projetu sira tenki tuir etap serbisu hanesan: tenki iha sistema serbisu di’ak, etap serbisu di’ak atu kontrola, formatu serbisu no mós supervizaun diáriu iha terrenu.

Diretór Ezekutivu hafoin aprezentasaun, rekomenda ba Ministériu sira no instituisaun estadu sira presiza hadi’a koordenasaun serbisu, fó kapasitasaun ba grupu tékniku no mós kompleta fasilidade ba téknku sira nia serbisu atu nune’e bele ajuda no garante progresu ezekusaun sa’e liu-liu ba iha setór insfraestrutura.