DIRETÓR EZEKUTIVU HO ESTRUTURA ADN, I.P. HASORU MALU HO FUNSIONÁRIU FOUN

Díli, loron segunda 5 Jullu 2022 - Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Eng. Mariano Renato Monteiro da Cruz ho nia Adjuntu Diretór Ezekutivu Eng. Januario M. Guterres hamutuk ho nia koordenadór, asesór no kargu xefia sira hasoru malu ho funsionáriu foun ADN, I.P. iha sala enkontru MPO/ADN.

Iha sorumutu ne’e Diretór Ezekutivu ADN, I.P. halo abertura direta ba atividade ida ne’e hodi esplika mós lala'ok servisu no Sistema ne’ebé ADN, I.P. uza hodi kontrola servisu tomak iha instituisaun ida ne’e hanesan koñesimentu báziku ba funsionáriu foun sira no mós halo introdusaun pesoál entre parte rua atu bele koñese malu di'ak liu tan.

Aleinde ne’e Adjuntu Diretór Ezekutivu mós hato'o parabéns no fó benvindu ba funsionáriu foun sira ne'ebé pasa iha teste finál hodi mai servisu hamutuk iha ADN no nia parte husu ba funsionáriu foun sira atu hala'o servisu la'ós de'it haree ba saláriu maibé tenke responsabiliza ba servisu ne'ebé orienta husi superiór sira hodi bele kontribui mós ba dezenvolvimentu estadu nian.

Hafoin sorumutu ne’e, funsionáriu foun sira mós hasoru direta sira nia koordenadór tuir unidade ne'ebé sira aplika hodi rona orientasaun ba faze tuir mai atu hala’o servisu tuir ida-idak nia responsabilidade.