DIRETÓR EZEKUTIVU AKOMPAÑA VISE-MINISTRU OBRAS PÚBLIKAS APREZENTA RELATÓRIU INSPESAUN NO VERIFIKASAUN PROJETU P44 BA KOMISAUN E PARLAMENTU NASIONÁL

Loron sesta, 10 Juñu 2022, Diretór Ezekutivu Ajénsia Dezenvolvimentu Nasionál, Institutu Públiku (ADN, I.P.) ho Koordenadora Emerenciana da Costa Maia Freitas (UCVQ) Eng. Emerenciana da Costa Maia Freitas akompaña Vise-Ministru Obras Públikas Nicolau Lino Freitas Belo no ekipa halo aprezentasaun relatóriu inspesaun no verifikasaun ba projetu P44 ba komisaun E Parlamentu Nasionál ne’ebé trata ba asuntu infraestrutura iha sala GMPTL.

Aprezentasaun relatóriu ne’e preside meza husi Vise-Prezidente Komisaun E, Deputadu Vabião de Oliveira nomós membru deputadu sira ne’ebé mak koloka kestaun balun liga ho projetu P44 nian.

Relatóriu husi rezultadu inspesaun no verifikasaun ne’ebé ekipa tékniku halo ba projetu P44 ninian lidera husi Vise-Ministru Obras Públika hahú husi faze inisiasaun ba inspesaun to’o finál sempre hetan observasaun direta husi Komisaun E Parlamentu Nasionál.

Iha biban ne’e Diretór Ezekutivu aprezenta mós ba deputadu sira kona-ba papel prinsipál ADN, I.P. bazeia ba Dekretu Lei Númeru 60/2020 de 25 de Novembro mak halo verifikasaun, avaliasaun, no inspesaun hodi sertifika projetu kapitál dezenvolvimentu nomós projetu sira kategoria Bens de Servico no Transferénsia Públika ne’ebé relasaun ho projetu fíziku ho montante boot liu $50.000 nomós elabora Estandarizasaun Tékniku ne’ebé relasiona ho dezenvolvimentu infraestrutura iha Timor-Leste.